Wada hadaladii lagu sii deyn lahaa 8 Badmaaxiin Masaari ah oo cakirmay
Qoysaska siddeed badmaaxiin Masaari ah oo lagu haysto markab ay burcad-badeeddu afduubteen ayaa wajahaya walaac sii kordhaya, kaddib markii ay muddo ku dhow afar bilood ka soo wareegtay markii markabka loo kaxeeyay biyaha Soomaaliya.
Badmaaxiinta ayaa la sheegay in lagu qabtay markabka shidaalka qaada ee M/T Eureka, kaas oo 2-dii May 2026 laga afduubtay biyaha Yemen, kaddibna burcad-badeeddu u soo weecisay dhinaca xeebaha Soomaaliya, gaar ahaan deegaannada Puntland.
Wararka laga helayo xaaladda ayaa sheegaya in wada-hadallada lagu doonayo in lagu sii daayo badmaaxiinta ay weli socdaan, balse ay caqabad ku noqdeen khilaafyo ku saabsan cidda bixinaysa lacagta madax-furashada.
Sida uu sheegay Kabtan Al-Sayyid Al-Shaadhili, oo ah madaxa ururka saraakiisha badda ee Masar, milkiilayaasha markabka ayaa doonaya in shirkadaha caymiska ay qaadaan masuuliyadda bixinta lacagta, halka shirkadaha caymisku ay arrintaas ka gaabsanayaan. Khilaafkaasi ayaa la sheegay inuu dib u dhigayo heshiis lagu soo afjari lahaa afduubka.
Qoysaska badmaaxiinta ayaa sheegay inaysan haynin xog ku filan oo ku saabsan xaaladda dadka la haysto ama waqtiga ay qaadan karto in la sii daayo.
Xaaska mid ka mid ah badmaaxiinta, Axmed Maxamuud Sacad, Nadia Cabdulsalaam, ayaa sheegtay in aysan jirin wax cusub oo ku saabsan xaaladda ninkeeda.
Xaaladda qoyska Axmed ayaa sii murugootay kaddib markii aabbihii uu toddobaad ka hor u geeriyooday wadne-qabad lama filaan ah, isaga oo aan helin fursad uu kula hadlo wiilkiisa ama ogaado xaaladdiisa.
Afduubka badmaaxiinta Masaarida ayaa kusoo beegmaya xilli ay soo baxayaan calaamado muujinaya in dhaqdhaqaaqa burcad-badeedda Soomaaliya uu mar kale kordhayo, kaddib sannado ay weerarradu hoos u dhaceen sababo la xiriira howlgallada ciidamada badda caalamiga ah iyo adkaynta amniga xeebaha.
