Soomaali ku jiray 50 qof oo laga soo badbaadiyey doon ku degtay xeebaha Liibiya

Muhaajiriin Soomaali ah ayaa ka mid ahaa 50 qof oo laga soo badbaadiyey doon alwaax ah oo ciriiri ahayd, taas oo ku burburtay meel ka baxsan xeebaha Liibiya, kaddib markii toddobo qof ay ku dhinteen isku day ay ku doonayeen inay uga gudbaan Badda Mediterranean-ka, sida ay sheegtay hay’adda gargaarka bani’aadannimo ee Talyaaniga.

Dadka la badbaadiyey ayaa waxaa soo samatabbixiyey markabka Life Support, oo ay maamusho EMERGENCY, kaddib markii doonta laga helay gudaha aagga baarista iyo samatabbixinta ee Liibiya.

Sida ay sheegeen dadka la badbaadiyey, kooxdu waxay waaberigii 16 Agoosto ka soo ambabaxday magaalada Zuwara ee galbeedka Liibiya.

EMERGENCY ayaa sheegtay in 50-ka qof ee la badbaadiyey ay ka koobnaayeen 45 rag ah iyo shan dumar ah, halka 29 ay ahaayeen carruur aan cidina la socon, kuwaas oo ay ku jireen 26 wiil iyo saddex gabdhood.

Laba ka mid ah dadka la badbaadiyey ayaa xaaladdoodu halis ahayd, kaddib markii ay la kulmeen dhibaatooyin xagga neefsashada ah, waxaana loo baahday in si degdeg ah caafimaad ahaan loo daadgureeyo.

Hay’addu waxay sheegtay in dadka la badbaadiyey ay u kala dhasheen Soomaaliya iyo Masar, balse aysan weli shaacin tirada dadka dal kasta ka soo jeeda. Sidoo kale lama xaqiijin dhalashada iyo da’da toddobada qof ee ku dhintay safarka.

Markabka samatabbixinta ayaa markii hore raadinayey deked ammaan ah oo u dhow si dadka loo soo dejiyo, balse markii dambe waxaa loo qoondeeyey dekedda Bari ee koonfurta Talyaaniga.

Dhacdadan ayaa ka dhacday marinka Bartamaha Mediterranean-ka, oo ah mid ka mid ah waddooyinka ugu waaweyn ee ay muhaajiriintu uga safraan Waqooyiga Afrika kuna gaaraan Yurub, sidoo kalena loo arko mid ka mid ah waddooyinka badeed ee ugu halista badan dunida.

Hay’adda Caalamiga ah ee Socdaalka IOM ayaa sanadkan diiwaangelisay boqolaal qof oo ku dhintay ama lagu la’yahay marinka Bartamaha Mediterranean-ka, iyadoo ka digtay in tirada dhabta ah ay intaas ka badan karto, maadaama shilal badan oo badda ka dhaca aan la diiwaangelin.

Ilaa hadda ma cadda in Soomaali ay ku jireen toddobada qof ee ku dhintay safarkan. Dowladda Soomaaliya ayaan sidoo kale weli wax war ah ka soo saarin dhacdadan.