Dimuqraadiyiinta Senate-ka Mareykanka oo hor istaagay hindise-sharciga difaaca sababo la xiriira dagaalka Iran

Xubnaha xisbiga Dimuqraadiga ee Aqalka Senate-ka Mareykanka ayaa muujiyay sida ay uga soo horjeedaan dagaal lala galo Iran, iyagoo hor istaagay in la meel mariyo sharciga sanadlaha ah ee siyaasadda difaaca dalka, kaas oo loo yaqaan (NDAA).

Sharcigan, oo caadiyan hela taageero ballaaran oo ka timaadda labada xisbi, ayaan u gudbin marxaladda xigta ee Senate-ka kadib codbixin ay 50 xildhibaan u codeeyeen, halka 46 ay ka soo horjeesteen.

Inkastoo ay weli bilo ka harsan yihiin ansixinta kama dambaysta ah ee sharciga, haddana guuldarrada ku timid u gudbintiisa waxay muujinaysaa kala qaybsanaanta xooggan ee ka jirta Senate-ka ee ku saabsan dagaalka Iran iyo saameynta uu ku yeelan karo siyaasadaha iyo miisaaniyadda Wasaaradda Difaaca Mareykanka.

Senator Richard Blumenthal, oo ka tirsan xisbiga Dimuqraadiga kana ah xubinta ugu sarreysa ee mucaaradka ee Guddiga Adeegyada Ciidamada ee Senate-ka, ayaa wariyeyaasha u sheegay ka hor codbixinta in sharcigan uu si dhab ah uga dhigan yahay taageeridda dagaalka Iran.

“Aragtidayda, sharcigani wuxuu ka dhigan yahay sii wadista maalgelinta dagaalka, iyadoo maamulka hadda jira uusan wax isla-xisaabtan ah muujin,” ayuu yiri.

“Ka hor inta aan u codeyn Sharciga Oggolaanshaha Difaaca Qaranka, waxaan rabaa in maamulka uu si cad u qeexo istaraatiijiyaddiisa iyo qorshihiisa ugu dambeeya ee Iran, isla markaana uu oggolaansho ka helo Kongareeska sida uu dhigayo War Powers Act.”

Senator Tammy Duckworth, oo iyaduna ka tirsan guddiga isla markaana ah Dimuqraadi, ayaa sidoo kale sheegtay inaysan u codeyn doonin in sharcigu u gudbo marxaladda xigta ilaa lagu daro wax-ka-beddel ay soo jeedisay, kaas oo looga hortagayo in maalgelin dheeraad ah loo qoondeeyo howlgallada weerarrada ah ee ka dhanka ah Iran.