๐๐๐๐๐ฑ๐ฐ๐๐ฒ๐ง๐๐ก๐ ๐๐๐ฆ๐ก๐ฎ๐ฎ๐ซ๐ข๐ฒ๐๐๐๐ ๐๐จ๐ฆ๐๐ฅ๐ข๐ฅ๐๐ง๐ ๐จ๐จ ๐ค๐ฎ๐ฅ๐๐ง ๐ฆ๐ฎ๐ก๐ข๐ข๐ฆ ๐๐ก ๐ฅ๐ ๐ฒ๐๐๐ฌ๐ก๐๐ฒ ๐๐จ๐ฆ๐ข๐ฌ๐ก๐๐ง๐ค๐ ๐๐จ๐จ๐ซ๐๐ฌ๐ก๐จ๐จ๐ฒ๐ข๐ง๐ค๐ ๐๐๐ซ๐๐ง๐ค๐, ๐ค๐๐ฅ๐๐ง๐ ๐ก๐๐๐ฅ๐๐ฒ ๐๐ข๐ข๐ฐ๐๐๐ง๐ ๐๐ฅ๐ข๐ง๐ญ๐ ๐๐๐ฌ๐ซ๐ข๐ ๐ ๐๐ก ๐๐ ๐๐จ๐๐๐ข๐ฑ๐ข๐ฒ๐๐ฒ๐๐๐ฌ๐ก๐.
Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), ayaa maanta kulan muhiim ah la yeeshay Komishanka Doorashooyinka Qaranka JSL, kulankaasi oo lagaga arrinsanayey dar-dargelinta hirgelinta Diiwaangelinta Casriga ah ee Codbixiyayaasha, si loo xoojiyo hannaanka Dimuqraadiyadda ee dalka iyo kalsoonida ay codbixiyeyaashu ku qabaan geeddi-socodka Doorashooyinka dalka.
Ugu horrayn, Komishanka Doorashooyinka Qaranka JSL ayaa Madaxweynaha la wadaagay Qorshe Hawleed dhammaystiran, Hab-raacyada farsamo iyo Jadwalka lagu hagayo hirgelinta Diiwaangelinta Cusub ee Casriga ah ee Codbixiyayaasha, taasi oo laga fulin doono dhammaan gobollada iyo degmooyinka dalka.
Sidoo kale, Komishanka Doorashooyinka Qaranku waxa ay Madaxweynaha u sharraxeen in nidaamka Diwaangelinta Cusub uu ku salaysan yahay adeegsiga aqoonta iyo tiknoolajiyadda casriga ah ee xilligan, si loo xaqiijiyo Diiwaangelin cusub oo sugan, daah-furan, sax ah oo la jaan-qaadaysa Halbeegyada Caalamiga ah, isla markaana fududaynaysa ka qaybgalka muwaadiniinta JSL ee xaqa u leh codbixinta iyo tayaynta guud ee geeddi-socodka Dimuqraadiyadda iyo hannaanka doorashooyinka dalka.
Madaxweynaha ayaa Xubnaha Komishanka Doorashooyinka Qaranka ku bogaadiyey dedaalka ay ugu jiraan horumarinta nidaamka Diwaangelinta iyo Doorashooyinka dalka, isaga oo ku boorriyey in ay sii xoojiyaan dadaalkooda, si loo xaqiijiyo diiwaangelin tayo leh oo gaadha dhammaan muwaadiniinta xaqa u leh codbixinta.
Dhinaca kale, Madaxweynaha Jamhuuriyadda Somaliland ayaa adkeeyey in dhismaha hannaanka Diwaangelinta Codbixiyayaasha oo casri ahi uu saldhig u yahay xoojinta dimuqraadiyadda, ilaalinta xuquuqda muwaadiniinta iyo xaqiijinta doorashooyin xor iyo xalaal ah oo lagu wada kalsoon yahay.
Madaxweynaha Jamhuuriyadda Somaliland waxa uu Xubnaha Komishanka Doorashooyinka Qaranka (KDQ) u xaqiijiyey in Xukuumaddu ay ka soo baxayso waajibaadkeeda la xidhiidha diyaarinta dhaqaalaha ku baxaya hirgelinta Diiwaangelinta Cusub ah ee Codbixiyayaasha dalka.
Kulanka ayaa ku soo dhammaaday is-afgarad ku saabsan xoojinta wada-shaqaynta Hay’adaha ay khusayso, diyaarinta iyo dar-dargelinta hannaanka farsamo iyo ka maamul ee Diwaangelinta cusub, iyada oo laga faa’iidaysanayo tiknoolajiyadda casriga ah si Jamhuuriyadda Somaliland u sii xoojiso sumcadeeda ku aaddan qabsoomidda doorashooyin si nabad ku dhaca, xor ah oo lagu wada kalsoon yahay.
