Mareykanka oo Iiraan ku amray inay aqbasho guul-darro, xiisadda Bariga Dhexe oo cirka isku shareertay
Mareykanka ayaa si adag ugu baaqay Iiraan inay aqbasho waxa uu ku tilmaamay “guul-darro,” isaga oo ku hanjabay in haddii ay diido ay la kulmi doonto weerarro ka xooggan kuwii hore. Dowladda Iiraan ayaa si cad u diiday dalabkaas, iyadoo sheegtay inaysan oggolaan doonin cadaadis, isla markaana ay sii wadi doonto weerarrada ay kaga jawaabayso duqeymaha lagu hayo.
Weerarro ay iska kaashanayaan Mareykanka iyo Israa’iil ayaa lagu qaaday gudaha Iiraan, halka gantaallo ay Iiraan ridday ay gaadheen badhtamaha iyo waqooyiga Israa’iil. Is-weydaarsigan militari ayaa sii xoojiyay xiisadda.
Dhanka Lubnaan, ciidamada Israa’iil ayaa sii xoojiyay duqeymaha ay ka wadaan koonfurta dalkaas, iyadoo Ra’iisul Wasaaraha Israa’iil Benjamin Netanyahu uu sheegay in dowladdiisu ballaadhinayso waxa uu ku tilmaamay “aag difaac” oo laga sameynayo xadka koonfureed ee Lubnaan.
Saameynta colaaddan ayaa gaadhay dalal kale oo Khaliijka ah, iyadoo ugu yaraan laba qof ay ku dhinteen, saddex kalena ay ku dhaawacmeen magaalada Abu Dhabi, kadib markii ay ku dhaceen burbur ka dhashay gantaallo la soo riday. Dalalka Baxrayn, Kuweyt iyo Sacuudi Carabiya ayaa iyaguna sheegay inay qabteen gantaallo iyo diyaarado aan duuliye lahayn (drone) oo laga soo tuuray dhanka Iiraan.
Qaramada Midoobay ayaa ka digtay cawaaqibka ka dhalan kara haddii la xidho marin-biyoodka muhiimka ah ee Hormuz, kaas oo laf-dhabar u ah isu socodka shidaalka caalamka. Hay’addu waxay sheegtay in tallaabo kasta oo halis gelisa marinkan ay si weyn u saameyn karto dhaqaalaha adduunka.
Wararka ayaa sidoo kale tilmaamaya in khasaaraha rayidka uu sii kordhayo, iyadoo dad badan ay ku dhinteen ama ku dhaawacmeen weerarrada isdaba joogga ah ee ka socda dalal kala duwan oo gobolka ah, inkastoo tirooyinka rasmiga ah ay wali isbedbeddelayaan.
Guud ahaan, xaaladda Bariga Dhexe ayaa u muuqata mid sii xumaanaysa. Beesha caalamka ayaa sii kordhinaysa baaqyada ku aaddan in la dejiyo xaaladda, lana helo xal diblomaasiyadeed oo looga hortago dagaal ballaadhan oo saameeya gobolka iyo caalamkaba.
