Faahfaahin dheerada oo ka soo baxaysa duqeyn xagga cirka ah oo lala beegsaday garaash ku yaala Buq-Aqable
Weerar xagga cirka ah oo ay qaaday diyaarad nooca aan duuliyaha lahayn ayaa shalay galinkii dambe lala beegsaday garaash ku yaala magaalada Buq-Aqable oo qiyaastii 90 km Koonfur Galbeed ka xigta magaala madaxda Gobolka Hiiraan ee Beledweyne.
Barta X ee Hay’adda Sirdoonka Soomaaliya ayaa lagu faafiyay warka weerarka Buq-Aqable, waxana lagu sheegay in hawlgal ay iska kaashadeen Hay’adda NISA iyo Saaxiibbada Caalamka lagu burburiyay xarunta kaydka hubka iyo gaadiidka Al-Shabaab ee Buq-Aqable, waxana jira bay tiri khasaare soo gaaray cadowga, mase sheegin inta uu la egyahay khasaaruhu.
Dad ku sugan Buq-Aqable ayaa laga soo xigatay in la duqeeyay garaash ku yaala Buq-Aqable oo ay isticmaalaan ururka Al-Shabaab.
Ugu yaraan 3 qof ayaa lagu dilay duqeynta oo labo kamid ah ay ahaayeen Al-Shabaab, sida illo wareedyadaasi laga soo xigtay.
Faahfaahin intaa ka badan lagama hayo goobta duqeyntu ka dhacday maadaama aanay dadku u dhawaan karin sababbo la xiriira Al-Shabaab oo aan ogolayn in loo dhawaado.
Al-Shabaab dhankooda kama hadlin duqeynta ka dhacday Buq-Aqable, waase duqeyntii sedexaad oo lala beegsado xarumo Al-Shabaab ku lahaayeen Galhareeri oo ka tirsan Galgadiid iyo Buq-Aqable oo ka tirsan Hiiraan tan iyo markii uu dhacay dagaal kii khasaaraha badan dhaliyay Arbacadii la soo dhaafay ee kooxdu ku qaaday magaalada Caad ee gobolka Mudug.
