Saldhigyada Police-ka Somaliland waa xarumaha Maandooriyaha
Haddaad gelin dambe maalintii amaba habeenimo tagto saldhigyada bilayska ee Somaliland dhammaantood waxaad ugu tegi,askar iyo maxaabiista qaarkood oo cirkaa maraya mirqaan, caqligiina ka tegay (mirqaan waa sikhrad qofka caqligiisu beddelmo). Adduunyada kale xataa Itoobiyadaa agteena ee qaadku innooga yimaad iyo Jabuutidaa yarna dhahoo waa ka mamnuuc qof shaqo ku jiraa inuu balwado maankiisa wax u dhimaya sida qaadka isticmaalo. Gaalada dunida kale waa ka mamnuuc marka ay shaqada ku jiraan inay koob yar oo khamriya oo ka mirqaan yar mijin qaada afka saaraan. Bal ka warran nin jawaano qaada cunaya oo hubaysan, dumar iyo carruurna loo soo silsiladeeyey ooy u xidhan yihiin.
Xataa kantaroolada dalka ee magaalooyinka u dhexeeya waa majlisyo qaad (marka laga reebo ka Abaarso oo hadh iyo habeen askar giijisane taagan yihiin). Galabtii iyo habeenkii ninka askariga ihi uma kici karo xataa inuu birta ka qaado baabuurta, iskaba illow badhitaane. Waxa birta ka qaada carruurta iyo dumarka shicibka ah ee khudradda iwm ku ii-iibiya meesha. Waa askartii lagu aaminay nabadgelyada dalka. Baabuurta qaadka ee Itoobiya ka timaada sheedda marka laga arko ayaa birta laga sii qaada. Isagoo 100k/h ku ordaya ayuu soo maraa uu halis iyo khatar geliyaa dadka meesha jooga iyo baabuurta siduu sharcigu ahaa u joogsatay kantaroolka. Haddii laga sii qaadi waayo birta oo laga kala yaaci waayo, waxa meesha joogaba wuu jiidhiyaa.
Askari baan maalin ku idhi: Waar sharciga may ka sarreeyaan maxaad uuga sii qaadeen birta? Wuxuu yidhi waraaqbay ka sitaan jananka booliiska oo lama hadli karno !! ( dhowr sano ka horbay ahayd, janan hore oo bilayskaa waqtigaa madax ka ahaa), in wali waraaqdaa ama amar hoose la bixiyo ma ogi. Laakiin weli sidiibaa birta looga sii qaadaa loogana kala yaacaa.
Ku madax ka ahaa ciidanka nabadgelyada ee waddooyinka (gobol ka mida gobolada dalka) ayaan maalin ku idhi : baabuurtan jaadka ee sida argagaxa leh u dhex eryaya magaalada ee halis ku ah carruurta iyo dadka waawayn een ka ordi karayn maad wax ka qabatid? Wuxuu iigu jawaabay qaadka ayay i siiyaan ee maxaa iga galay dadkaad sheegayso. Naxdin iyo af kala qaadbay igu noqotay.
Sida booliska waddanka balwaddu u baabiisay maaha wax sheeko lagu koobi karo. Qof wal oo dalka joogaana way u muuqataa. Waxa la yaab leh in iyagoo dirayskii xidhan oo shaqadii ku jira ay haddana si foolxumo ah oo muuqata u icticmaalayaan maandooriyahaa. Dawladdu may kari wayday ugu yaraan inta ay shaqada ku jiraan inay ka mamnuucdo, inay dirayska sharaf u yeesho. Balwaddani waa ta keenta xaaladdii uu ka sheekaynayay abwaan Abees ee uu kala kulmay saldhigga koodbuur ee Hargaysa. Saldhigyada kale oo dhanna waa la mid. Markuu ka hadlay uu tilmaamay foolxumadan saldhigyada ka jirta ee keentay in askartii iyagoo daroogaysan ay ku xadgudbaan shicib u xidhan, halkii dawladdu ku baraarugi lahayd ayaa isagii la xidhay; oo ragga ugu darajada waawayn booliiska intay soo fadhiisteen teleshanka yidhaahdeen booliiskii ayuu caayay!! Miyuu caayay mise wuxuu arkay uumbuu sheegay? Galdalloolada jira ayuu farta ugu fiiqay; waxay ahayd inay u mahad naqaan waxna ka qabtaan. EE inay isdifaac iyo dafiraad galaan maaha. Aaway barlamaankii dalku mayna ahayn kuwii masuuliyiinta dawladda toosin lahaa ee waajibkooda inay ka soo baxaan u tilmaami lahaa? Aaway xisbiyadii mucaaridku? Mise iyagu doorasho iyo kursiga dalka u sarreeya uumbay u waasheen oo dalka intiisa kale waxba kama gelin?
Saldhigyada bilayska waxaad ku arkaysaa eedaysanayaashii xidhnaa oo qaarkood loo firaashay oo qayilaya, sigaarka iyo shaahana isku daldalaya ood mooddo inay joogaan xeryihii qaadka oo askartuna iyaga u adeegayso!! Waxaad is waydiin dadkani may xidhan yihiin mise meesha way u qayilaad yimaadeen?
Bal dadwaynoo, xildhibaanooy, madaxeey soo mara saldhigyada booliiska iyo kantaroolada oo soo arka waxa ka socda? Saxaafadda madaxa bannaan waxaad moodaa in shaqadoodu tahay kaliya inay siyaasi mucaarid ah ama muxaafid ah uun wararkiisa iyo kursi ku dagaallankooda soo gudbiyaan. Laakiin waa inay adeegyada bulshada ee dawlad laga sugo ee la duudsiyey iyo u adeegayaasha shaqadoodii gabay inay soo ban dhigaan. Si wax looga qabto! Saxaafaddu waa toosin iyo baraarujin wixii qaldan. Qaata kamarooyin qarsoon oo soo duuba waxa saldhigyada ka socda, u dhiiba kamarooyin qarsoon dad aan caan ahayn oon la garanayn! Mise saxaafaddu way baqaysaa?
Allaa Mahad leh
Qore: Mr. AYAANLE
