Askari Ka Tirsan Madaxtooyadda Puntland Oo Boosaaso Lagu Dilay Iyo Saddex Ruux Oo La Dhaawacay.

Boosaaso-(OWN)-Askari ka tirsan ciidamada Puntland, ayaa lagu toogtay Magaalada Boosaaso ee Gobolka Bari, kadib markii askarigaan iyo midka kale oo wada socday ay soo weerareen dabley hubaysan.

Labada askari ayaa waxaa lagu furay rasaas, waxaana taasi ay keentay in hal askari uu dhintay, mid kalena dhaawac uu noqday, iyadoo wararku ay sheegayaan rasaastii lagu furay askartaasi inay ku dhaawacmeen laba ruux oo shacab ah.

Falkaan oo ka dhacay Magaalada Boosaaso ee Gobolka Bari ayaa askarta la dhaawacay waxaa la sheegay inay ka tirsan yihiin ciidamada Madaxtooyadda Puntland.

Raggii ka dambeeyay falka dilka ah ee loo gaystay askarigaasi ayaa ka baxsaday goobta, waxaana wararku ay sheegayaan in dhaawaca saddexda ruux ee midi uu askariga yahay in loo qaaday Isbitaalka Magaalada.

Boosaaso ayaa waxaa dilal ka gaysta dabley ka tirsan Daacish iyo al Shabaab, illaa haddana lama oga dadka falkaasi gaystay kuwa ay yihiin.

Ciidamo ka tirsan Madaxtooyadda Boosaaso ee Puntland ayaa ku soo yaacay Magaalada gudaheeda, kuwaasi oo wada hawlgalo ammaanka lagu xaqiijinaayo.