Lixda Qodob Oo Dawladda KENYA Ku Diidday Dhagaysiga Dacwadda Kiiska Badda

Dowladda Kenya ayaa ku wargelisay Maxkamadda Caalamiga ah ee Caddaaladda Adduunka in aanay ka qeyb geli doonin dhgeysiga dacwadda badda ee ka dhaxeysa Soomaaliya. Dowladda Kenya ee muranka galisay Badda Soomaaliya ayaa durba u muuqata mid is dhiibtay ama si kale haddii aan u nidhaa sheeko Muran ah bilawday iyada oo sheegtay in ay tabaneyso caddalaad darro ka jirta maxkamadda ICJ, taasoo diidday in dib loo dhigo kiiska markii afaraad, waxayna marmarsiyo ka dhigatay xanuunka COVID-19.

Sida ay warbaahinta Kenya ku warrantay dowladda Kenya ayaa sabab uga dhigtay arrintan inay ka cabanayso in maxkamaddu aanay si xaq ah ula dhaqmin Kenya iyo in maxkamaddu aanay doonayn in ay tixgaliso codsiga Kenya ee ah in dib loo dhigo dhageysiga kiiska iyada oo sabab looga dhigayo feyriska Corona.

Xeer ilaaliyaha guud ee dalka Kenya Kihara Kariuki ayaa go’aanka dowladda maxkamada ICJ u gudbiyay usbuucii la soo dhaafay xilli maalmo uun ay ka dhinayd bilaabashada dhageysiga kiiska berri oo Isniin ahna ay ahayd maalinta loo ballansanaa in dhagaysigu dib u furmo.

“Kenya waxay rajeynaysaa inay maxkamadda ku wargaliso in aysan ka qeyb galayn dhageysiga kiiska ee bilaabanaya 15 March,” waxaa sidaasi lagu sheegay warqad uu xeer ilaaliyaha guud Kenya u diray maxkamadda. “Kenya waxa ay jeceshahay in ay ku wargaliso maxkamada, iyada oo u sii marineysa Diiwaanhayaha, in aysan ka qeyb galeynin dhageysiga kiiska halkaan ku xusan, hadii ay u socoto si isku mid ah laga bilaabo Maarso 15, 2021, sida hada loo qorsheeyay” ayaa lagu yidhi qoraal kasoo baxay xeer ilaaliyaha guud ee Kenya Paul Kihara Kariuki. Warqadaan waxaa la gaarsiiyay maxkamadda cadaaladda adduunka ee Holland ku talla taariikhdu markey aheyd March 11 taas oo uu u qoray Phillippe Gautier, diiwaan hayaha maxkamada.

Iyadoo ay taasi jirto ayey Kenya ku doodaysaa waxa ay ku sheegtay in ay cadaalad darro ka tirsanayso maxkamadda iyo in uu garsoorayaasha xubin ka yahay madaxweynihii hore ee ICJ Cabdiqawi Axmed Yuusuf oo ah muwaadin Soomaaliya.

Tallaabadan lama filaanka ah ayaa imanaysa iyada oo maalinta berrito ah loo ballansan yahay in maxkamadda Caalamiga ah ee Cadaalada ay billowdo dhageysiga dacwadda muranka badda ee Kenya iyo Soomaaliya.

Waxaa uu sidoo kale go’aanka ku soo beegmayaa xilli uu aad u xumaaday xiriirka dublamasiyadeed ee u dhaxeeya labada dal.

QODOBADA AY KENYA KU DOODEYSO:

Maxay yihii qodobada Kenya ku doodayso in maxkamadda dib loogu dhigo

1 – Kenya waxa ay ku doodaysaa in ay maxkamadda cadaallada ee adduunku aanay labada dhinac u sinayn, oo ay u xaglineyso dhinaca Soomaaliya.

2 – In ICJ diidday dalabkii Kenya ee dib loogu dhigi lahaa kiis dhagaysiga.

3- In faafitaanka cudurka COVID-19 dartiis aanay Kenya awood u yeelan inay sidii loo baahnaa ugu diyaar garowdo kiiska.

4 – Kenya ayaa ku doodday cudurka COVID-19 dartiis, miisaaniyaddii dalkeeda ay gaadhay waxyeelo weyn, taasi oo saameyn ku yeelatay u diyaargarowga Kenya ee ah inay kiiska iska difaacdo, sida qoraalka lagu yidhi

5 – Kenya ayaa sheegtay in kiiskeeda uu ku dhisan yahay inay qaab sawir ahaan wax u muujiso, sidaas darteedna aanay fulin karayn ama ku muujin karayn muuqaal arag fogaansho ah oo lagu diyaariyay hannaan video ah.

6 – In garsoore Cabdulqawi Axmed Yuusuf oo ah Soomaali, uu qeyb ka yahay garsoorayaasha kiiska, iyada oo ay sheegtay in ka qeyb-galkiisa uu kaga mid yahay bahda Garsoorayaasha Maxkamadda Caalamiga ah ee ICJ aanay Kenya siineyn kalsooni ama aanay ku qabi Karin kalsooni.

In kasta oo ay Kenya ka laabatay, haddana Maxkamadda ICJ waxa ay sii wadi kartaa dacwadda oo waxay samayn kartaa xukun iyada oo adeegsanaysa doodihii ay Kenya hore u gudbisay.