Suxufi Raage Oomaar oo ka Hadlay Siday Somaliland ugu Baahan Tahay in Laga Taageero Ilaalinta Duurjoogta
Suxufiga caanka ah ee Raage Oomaar oo ah Tifaftiraha Arrimaha caalamiga ah ee Telefishanka ITV News, ayaa maqaal ku falanqeeyey siday Somaliland u ilaalinayso duurjoogta dalkeeda.
Raage Oomaar wuxuu qormadiisa ciwaan uga dhigay: “Dagaalka Somaliland ku ilaalinayso duurjoogta.” Warbixintaas waxa soo turjuntay Wakaallada Wararka Somaliland ee SOLNA, waxaanay u qorneyd sidan:
“Somaliland waa maxmiyad Ingiriisku hore u xukumi jiray oo ku taalla Geeska Afrika, waxa lagu sifeeyey mucjisada Afrika ee aanay ciddina waxba kala soconin. Somaliland waxay ku taallaa mandaqad wajahaysa cabaqado badan oo ay ka mid yihiin deganaansho la’aan siyaasadeed oo ay ku fidayaan xagjirnimada iyo qulqulatooyinku, laakiin Somaliland waxay iska ilaalisay halisahaas, waxaanay ka soo kabanaysaa abaar kulul oo ku habsatay saddexdii sannadood ee la soo dhaafay.
Xildhibaanno ka tirsan Baarlamaanka Ingiriiska ayaa kula kulmaya xarunta Baarlamaanka UK, Wasiirro ka socda Somaliland, waxaanay ka wada hadlayaan dagaalka ka dhanka ah ka ganacsiga sharci darrada ah ee dhoofka duurjoogta.”
Weriye Raage Omaar wuxuu ka sheekeeyey in carruurnimadiisii uu booqan jiray miyiga duleedka Hargeysa oo cagaarka dhirtu is-haysato, waxaanu intaas ku daray in bariga Somaliland ay wali ku sii nool yihiin duurjoog , kana baxaan dhirta fooxa iyo malmalka.
Suxufi Raage wuxuu warbixintiisa kaga warramay halista dhirta loo gubay dhuxulaysiga iyo nabaad-guurka ay ku keentay deegaanka Somaliland.
Waxa kaloo uu xusay in Somaliland ay ka qabsoomeen doorashooyin hal cod iyo hal qof ah, isla markaana awooda la iskugu wareejiyey si nabdoon, waxaanu ku dooday in aanay Somaliland dhaqaale u haynin ilaalinta duurjoogta dalka ku soo hadhay, gaar ahaan Harimacadka oo ay u baahan tahay in laga taageero arrintaas.
Ugu dambayn, Weriye Raage Oomaar wuxuu sheegay inuu dalalka Geeska Afrika ku soo arkay in kooxaha ka shaqeysta dhoofka duur-joogtu ay yihiin isla dadka ka dambeeya Tahriibka iyo xagjirnimada.
Weriye Raage Omaar
