Maxkamadda Gobolka Saaxil Oo Xukun Ku Riday Magafeyaal Yemeniyiin Ah Oo Xeebaha Berbera Dhalinyaro Ka Dhoofinayey
Berbera(OWN)- Maxkamadda Gobolka Saaxil ayaa xukuno kala duwan ku riday Rag magefayaal ah oo xeebaha gobolka Saaxil ka tahriibinayey dhallinyaro ay ka keeneen magaalada Burco ee Gobolka Togdheer.
Garsoore Axmed Yuusuf Cabdi oo ka tirsan Garsooreyaasha Maxkamadda gobolka Saaxil, ayaa ku dhawaaqay xukunka Ragaasi ayaa sheegay in laba ka mid ah Raggaasi u dhasheen Waddanka Yemen isla-markaana wateen laash yar oo ay doonayeen inay sifo sharci darro ah ugu tahriibinayeen Dalka Yemen 7 dhallinyaro reer Somaliland ah, kuwaasi oo aad u da’ yaryar.
Laba Mukhalas oo dhallinyarada Tahriibinayey oo magacyadoodu kala yihiin Cabdi Cali Kaahin iyo Ismaaciil Jaamac, waxay Maxkamaddu ku xukuntay min hal sanno iyo lix bilood oo xadhig ah, Labadii nin ee watay laashka la doonayey in dhallinyarada lagu qaado oo magacyadoodu kala yihiin Maxamed Saalax Cali iyo Naasir Jaabir Saalim oo Yemaniyiin ah ayaa lagu xukumay min afar sannadood oo xadhig ah, sida ay ku warrantay Wakaaladda Wararka Somaliland ee SOLNA oo Wargeyska Himilo Warkan ka soo xigtay.
Waxa kale maxkamaddu xukuntay in lala wareego laashkii ay wateen iyo Agabka loo yaqaano GPRS ama lagu hago laashka oo Raggaasi ay siteen.
Maxkamadda Gobolka Saaxil waxay min bil xadhig ah ku xukuntay lix ka mid ah dhallinyarad la tahriibinayey, maaddaama oo aanay ahayn qaangaadh, iyadoo mid ka mid ahna maxkamaddu u soo celisay xorriyaddiisii, kadib markii waxba lagu waayey.
Oodweynenews Hargeysa