Gabayga: XAG U DIRIR
Gabaygan waxa curiyay Abwaan Cali Axmed Kooshin. Waxa uu soo baxay 23/5/2018. Waxa uu ka hadlayaa xaaladaha uu marayo Dalku ; Caddaalad darrada iyo musuqa baahay ee ku habsaday Dalka. Sidoo kale waxa uu tilmaamayaa , Tabashada iyo Tacaddiga ay qabaan Reer Sool. Colaadaha dami waayay iyo Xasili waa’ga Ceel Afweyn. Waxa uu ku bilaabmayaa Gabaygu :
Calanyahaw rag baa kuu xarbiyay xay badhkood yahay e
Xabaalaha badhbaa kuugu jira oon xasuusnahaye
Xeeldheerayaal baa kuu dhintiyo kuman kaloo xaadle
Axmed Dhagax xaqiisaad tihiyo xawdi Harag-Waafi
Xuski Maxamed Cali iyo baad tihiyo xamarki Koodbuur
Xabaal ina mahdi iyo baad ka timi xalanow Koosaar
Xinjirtii Lixliyo baa ku dhalay dhimashadii Xaamud
Xundhur Aadan Shiinaad tihiyo Raage xubintii
Xiidmii Aadan saleebaan ayaan kugu xasuustaa
Gacma-dheere xooggiisi iyo xeelad Cumar-Toorri
Xulashadii Cuddaad ii tihiyo xididki Raamaale
Xabaduhu raggii ay dileen xay an ku illaawo
Xigaalkiyo dalku ba dhaxal u helay een xushaad tahaye
Xikmad kale ayaan kuugu qoray xarafkan tawxiide
Xaaje’ e xadgudub inaanu dhicin Eebbe la xasuusto
Oo xeer islaam la isku dhaqo kama xumaadeene
Xoqoshadu dalaalkay ka timi la is xaq marin waa’ e
Xujana taydu maahee markaan xaalka garan waayay
Xeedhada haddaan gacanta daray xeer se maan jabine
Xaaskii lixloo kugu dulqaday ayaad xaadir u ahayde
Xaqdarrada miyaanaad ka guban oonad ka xanaaqin?
Xumahana ma raallaad ka tahay xadhiga soo goostay?
Xaq u dirir miyaanaad ahayn baadil ka xaroobay?
Xalaal dhalad miyaanaad ahayn loo xinjiro daadshay?
Xusbad laawa yahaw naafadii kuu xubnaha beeshay
Xeerkiyo sharcigi lagu ma darin lamana xaalayne
Xiniinyaha kuway goysaybaa kugu ag xaasaabay
Xaruhumaad ku taal baa dulmiga lagu xareeyaaye
Xaq la duudsiyaaba ka jira xulufo beeloode
Xayndaabba koox baa fadhida oo xantoobsada e
Adigu na xuquuq lagu tuntaad dul xarfanaysaaye
Xaawalay gabawdiyo agoon xoolo li’I hayso
Xafiisyada waxaa tuman duqay laga xishoonaayo
Xildhibaanaduun baa galiyo kii xasarad haysta
Xuurtuun dadkii kale ugu dhimay meel cid loo xidhaye
Xididkaagu wuxu nuugayaa xal iyo laaluushe
Xaaraantu waa kaa mamnuuc xeeladaha qaare
Xukumada qalloocana adaan kaaga xadhig soohay
Xuduuddaadu waa daacad iyo xaq iyo miisaane
Xad ka baxa se waan kugu arkaa xiinka iyo roorka
Xildarradiina way kugu caddahay xani ba sheegaysay
Xamxamtiyo warkii suuqa yiil kugu xaqiiqoow
Xuuraanka iyo faalladii la isku soo xoor
Xagal daaci waa kugu cadyahay xaajo waa marage
Xalwad iyo rag baad malab u tahay xil iyo maamuus
Xigsintaad nirgaha uga listaa ooy xoorki dhamayaane
Xareed iyo barwaaqaad u tahay xero gu’ roobaad
Xil ku boobyadaad saaciddaa la xabsiyayn laa
Xeerkiyo sharcigi loo sinnaa laga xawaaree
Xilfi waxad la tahay Tuug wax xada aastay xididkii
Xurgufsade xilqaran saran yahay xero qabiil ootay
Xaabiyo dabkuu shidanayaa yahay xigaalkiisa
Xirfadlaha xuluul daaqyadaa calanyaw xiiseeya
Xeebaha sanaag bari ka xiga eed xasilin wayday
Xurma li’ida reer Sool qabaan ma xannibnaateene
Xuub caaro iyo meel kalaa la xodxodaayaaye
Xudun iyo Taleex waxa ka maqan xarunta Buuhoodle
Xaafadaha Hargeysaa la mida oo kala xaquuq roone
Kuwaasi na inay xamar tagaan saw xaq uma eeka ?
Xogta urursaneen kuu hayaa waa xil gudan waa’ e
Xisaabaha wixii hore qaldamay xanafti way taale
Xeerbeegti loo saaro iyo Xaakim baa geli
Xeer ilaashe guud iyo Qareen xaadir buu noqon
Xukun maalintuu soo baxuu xaal si uun noqone
Calanyahaw xaqsoorkii ku noqo waa xorriyaddaa e
Haddii kale in uu xuud ku liqo xuuri kula duusho
Ama ay Xanfaley kula tagtaa saw xal noqon mayso ?
Curiye: Cali Axmed Kooshin
cabdirisaaqanta@gmail.com
