Marwo Adna Aadan Ismaaciil oo ka Hadashay Siday u Aragto Wada-hadalada dib u Furmay ee Somaliland iyo Somalia
Hargeysa (OWN) – Ergeyga Somaliland u qaabilsan wada-hadallada ay la-galeyso Soomaaliya, Adna Aadan Ismaaciil ayaa ka warbixisay kulanka balllaadhan ee maanta ka dhacaya Jabuuti, kaas oo u dhexeeya dowladda federaalka iyo Somaliland.
Marwo Adna ayaa sheegtay inay marka hore soo dhoweyneyso in dib loo bilaabo wada-hadallada labada dhinac oo hakad ku jiray Afartii sano ee la soo dhaafay.
Adna Ismaaciil ayaa shaacisay in Madaxweyne Farmaajo uusan laheyn qowl , islamarkaana uu yahay qof aan fulin karin heshiisyada la galo, sida ay hadalka u dhigtay.
“Waxaa heshiis lala galaa qof qowl-leh oo wixii lagu heshiiyey fulin kara.” ayey tidhi Marwo Adan oo ah Ergeyga Somaliland u qaabilsan wada-hadallada Soomaaliya
Sidoo kale waxa ay ku eedeysay Madaxweynaha Soomaaliya, Mudane Maxamed C/llaahi Maxamed (Farmaajo) inuu burburiyey heshiisyadii hore ee ay wada gaadheen Soomaaliya iyo Somaliland, iyada oo Su’aal ka keentay wada-hadallada haatan dib u bilaabanaya.
“Waxaa is-weydiin leh wada-hadalladan iminka la rabaa ma kuwii horaa la ansixinayaa oo 8-aad, 9-aad iyo 10-aad ayaa ku biiraya.” ayey markale tidhi Adna Ismaaciil Aadan.