Dagaal Ba,an oo U dhexeeya Laba Beelood oo ka Qarxay Gobolka Sanaag
Hargeysa ( OWN) – Warar laga helayo gobolka Sanaag ayaa sheegaya in saaka Dagaal Qadhaadh oo u dhexeeya Laba beeleed uu ka qarxay gobolkaasi.
Dagaalka oo ah mid culus ayaa haatan ka socda deegaanka Waqdariye oo ka Tirsan Gobolka Sanaag, iyadoona la’isku adeegsanayo hubka noocyadiisa kala duwan.
Ilo deegaanka ah ayaa Oodwaynemedia U sheegay in dagaalkan uu salka ku hayo Arrimo la Xidhiidha dhul-daaqsameed ay isku qabteen maleeshiyaadka diriraya oo kasoo kala jeeda labadan Beelood.
Wararka ayaa sheegaya in dagaalkaasi lagu gubay Masjid, Guryo ay deganaayeen dad shacab ah iyo goobo kale, kadib markii Dab la qabad-siiyey .Sidoo kale wararka ayaa intaasi ku daraya inuu jiro khasaare kala duwan oo dhimasho iyo dhaawac-ba leh, balse aan la xaqiijin karin inta uu la’egyahay.
Xaaladda ayaa haatan aad u kacsan, mana jiro weli wax hadal ah oo ka soo baxay maamulka gobolka Sanaag iyo Madaxda Beelahan ku diriraya.
Gobollada Sool iyo Sanaag oo dhaca waqooyiga Somaliland ayaa waxaa inta badan ku soo laab laabta dagaallo u dhexeeya beelaha wada dega deegaanada gobolladaasi.
