Xukuumada Somaliland oo ka Hadashay Kulanka Madaxda Somalia iyo Safiirka Shiinaha ee Muqdisho
Hargeysa (OWN) – Xukuumada Somaliland ayaa ka hadashay kulankii shalay magaalada Muqdisho ku dhex-maray madaxweyne Farmaajo iyo Safiirka Shiinaha ee Soomaaliya, Qin Jian.
Wasiirka arrimaha dibedda Somaliland, Yaasiin Faratoon ayaa sheegay inaysan marnaba Somaliland saameyn ku yeelan doonin kulamada ka dhanka ah ee ay ku howlan tahay dowladda federaalku.
Wasiir Faratoon ayaa carabka ku adkeeyay in Xidhiidhka cusub ee Somaliland la yeelatay Taiwand uusan waxba ka badaleyn kulankaasi ka dhacay Muqdisho, oo si gaara diirada loogu saarayey Xidhiidhka iyo heshiiskaasi cusub.
“Waa wax aan fili karno, labadooda taas ayey ka wada duulayaan, laakiin annaga Nama khuseeyo, waxey iyagu ku heshiiyeen iyo waxey ka wada hadleenba lama socono mana ahan wax aan ku raacsanahay oo iyaga ayey danahooda tahay, anaga iyo Taiwan waxaa naga dhaxeeya dano kale,” ayuu yidhi Wasiir Yaasiin Maxamed Faratoon oo la hadlayay Warbaahinta Qaar.