Baanka Adduunka oo Xafiiskiisii ugu Horreeyay ka Furtay Magaalada Muqdisho
Muqdisho (OWN) – Ra’iisul Wasaaraha Xukuumadda federaalka Soomaaliya mudane Xasan Cali Khayre ayaa Xafiiskiisa kulan kula qaatay madaxweyne ku-Xigeenka Bangiga Adduunka, Xafiz Ghanim oo dalka soo gaadhay maanta, xadhigana ka jaray Xafiiska cusub ee Bangiga adduunku ku Yeelan doono Magaalada Muqdisho .
Kulanka oo ay ka qayb gashay agaasime gobaleedka IFC ee Afrika, Ms Jumoke Jagun-Dokonmu ayaa lagaga hadlay dar-dar gelinta qorshaha deyn Cafinta dalka Somalia, Taasoo lagu Beegsaday Higsiga bisha Febraayo ee 2020 iyo Shaqo Abuurka dhallinyarada.
Xafiz Ghanim ayaa kulanka ka caddeeyay inuu ku farxsanyahay in booqashadiisa ay ka tarjumeyso sida bangiga aduunka ay uga go’antahay taageerada Soomaaliya, shaqada wanaagsan ee dowladdu qabatay iyo hagaajinta lagu sameeyay hay’adaha dhaqaalaha dalka, waxuuna madaxda dowladda uga mahad celiyay hoggaanka wanaagsan.
Ra’iisul Wasaare Xasan Cali Khayre oo Bangiga adduunka uga mahad celiyay taageerada ay siiyaan shacabka iyo dowladda Soomaaliyeed ayaa caddeeyay in ay xukuumaddu sii wadi doonto dadaallada loogu jiro gaarista barta go’aanka ee Febaraayo.
Xafiz Ghanim ayaa shirka uu Ra’iisul Wasaaraha la yeeshay kadib waxa uu Xafiiska madaxweynaha si wadajir ah ugula shiray madaxweynaha jamhuuriyadda, mudane Maxamed Cabduullahi Maxamed Farmaajo iyo Ra’iisul wasaare Xasan Cali Khayre.
Madaxweynaha oo bogaadiyey dadaalka xukumadda ee dayn cafinta iyo horumarinta hannaanka maamulka maaliyada, ayaa bangiga adduunka uga mahad celiyay taageerada joogtada ah ee shacabka iyo dowladda Soomaaliyeed.
Dowladda federaalka Soomaaliya oo dadaal xooggan gelisay qorshaha deyn cafinta, ayaa ku guuleysatay in buuxda looga soo baxo dhammaan shuruudihii deyn cafinta ee SMP1, SMP2, iyo SMP3, meel gebabeba ah lasoo gaarsiiyo SMP4.
