Shirkada Som Petroleum Oo Shaacisay Shiidaal Tayo Leh Oo Ay Dalka Keentay
Masuuliyiinta shirkada Som Petroleum ayaa shacabka somaliland ugu bushaareeyey inay dalka keeneen shiidaal tayadiisu sarayso oo soo gaadhay magaalada Berbera.
Masuuliyiin ka tirsan shirkada Som Petroleum oo caawa shir jaraa,id ku qabtay xarunta shirkada ee badhtamaha magaalada Hargeysa ayaa sheegay in shiidaalka ay hada keeneen uu ku soo beegmay wakhti baahi weyn loo qabay.
Ugu horayn waxa shirkan jaraa,id ka hadlay madaxa suuq geynta ee shirkada Som Petroleum Maxamed Daahir Cabdale kaas oo shaaciyey inay dalka keeneen shiidaal tayadiisu sarayso oo buuxiyey dhamaan shuruudihii looga baahnaa waxaanu yidhi “Sida aad la wada socotaan baryahan dambe waxa wadanka somaliland ka jirtay cabasho ka timid shiidaalka ha ahaato shiidaalka oo yaraaday ama tayadiisii oo xumaatay, sidaas darteed haddii aanu nahay shirkada Som Petroleum waxaanu shacabka somaliland ugu bushaaraynaynaa in shirkadu ay keentay shiidaalkii la sugayey, taas oo markabkii siday uu ku soo xidhay dekeda Berbera maanta oo taariikhdu tahay 20/05/2018 , waxaanu markabkaasi sidaa shiidaal tayadiisu sarayso oo waafaqsan shuruucdii dalka u taalay ee laga rabay shiidaalka wadanka imanaya, waxa kale oo aanu ku faraxsanahay in shaybaadhka kaydka haamaha shiidaalka ee Berbera uu isaguna baadhay isla markaana sii daayey oo fasaxay, shahaadadii kale ee caalamiga ahayd ee lagu soo shaybaadhayna ay na soo gaadhay.”
Madaxa suuqgeynta shirkada Som Petroleum Maxamed Daahir Cabdala oo hadalkiisa sii wata ayaa shacabka ugu bushaareeyey in haatan laga baxayo shiidaal yaraantii dalka ka jirtay waxaanu yidhi “Waxaanu dadka somaliland u sheegaynaa inaynu ka haqab la nahay shiidaalka haday tahay mugiisii iyo dhinaca tayadaba, waanan ugu bushaaraynaynaa.”
Sidoo kale madaxa hawl gelinta shirkada Som Petroleum Naasir Cismaan Muxumed oo isaguna ka hadlay shirkan jaraa,id ayaa sheegay in shirkadu ay mar kasta dedaal ugu jirto inay dalka keento shiidaal tayadiisu sarayso waxaanu yidhi “Shirkada Som Petroleum mudo dheer ayey u adeegaysay shacbi weynaha somaliland, mudadaasna waxay ugu adeegaysay si hufan iyada oo dalka keenaysay shiidaal tayadiisu aad u sarayso, tusaale ahaan Shiidaalka aanu hada keenay oo ku soo beegmay wakhti baahi weyn loo qabay waa shiidaal tayadiisu gaadhsiisan tahay 95 Premier, kaas oo kaba sareeya heerka tayo ee looga baahnaa, talaabadaasi waxay ku tusaysaa ahmiyada iyo dedaalka ay shirkada Som Petroleum ugu jirto inay dalka somaliland keento shiidaal lagu kalsoon yahay oo tayadiisa la hubiyey.”
Sidoo kale madaxa hawl gelinta ee shirkada Som Petroleum Naasir Cismaan Muxumed oo hadalkiisa sii wata ayaa intaas raaciyey “Waxa kale oo farxad weyn noo ah in markabka shiidaalka ee la shubay uu tayadiisa hubiyey laabku, waxaanu waafaqsan yahay tayada shiidaalka ee haamaha Berbera ee somaliland, sidaas darteed waxaanu shacabka somaliland ugu bushaaraynaynaa in laga bilaabo beri ay heli doonaan shiidaal tayadiisu sarayso oo aad looga shaqeeyey, taasi waxay bushaaro iyo maalin taariikhiya u tahay oo ku suntan shirkada Som Petroleum.”
