Cristiano Ronaldo oo ka Hadlay Reebista , Laga Reebay Liiska Juventus Ee Kulanka Atalanta
Weeraryahanka Juventus Cristiano Ronaldo ayaa ka hadlay go’aanka looga reebay safka kooxdiisa ee la ciyaaraya Atalanta, wuxuuna soo qoray qoraal uu ku dajinayo taageerayaashiisa kuwaas oo mar walba jecel iney garoomada ku arkaan.
Xiddiga reer Portugal ayaa la badalay labadii kulan ee ugu dambeysay kulamada kooxdiisa, taasoo ku dhalisay inuu ka caroodo, balse wuxuu kadib laba kulan u saftay qarankiisa isagoo u dhaliyay 4-gool kana saaciday iney usoo baxaan Euro 2020.
Si kastaba Ronaldo wuxuu kadib kulamadiisa xulka xaqiijiyay inuu dhaawac ahaa, taasna waxey cadaadiska ka qaaday Maurizio Sarri kaas oo wax badan lagu eedeeyay inuu xiddiga ku gardarooday.
Iyadoo ay taasi jirto ayaa xiddiga mar kale laga saaray liiska kulanka Atalanta, macalinka reer talyaani ayaana xaqiijiyay in xiddiga uusan wali taam ahaansho dareemeynin markii ay xaalkiisa wax ka weydiiyeen.
Sarri wuxuu shirkiisa ku xaqiijiyay iney doonayaan Ronaldo inuu kasoo muuqdo kulanka isbuucaan ay ciyaarayaan Champions League.
Ronaldo isagoo adeegsana Instagram-ka ayuu soo qoray: “Waxaan diirada saarayaa inaan soo kabto si aan dhaqso usoo laabto”
Qoraalka xiddigaan wuxuu ku cadeynayaa inuu kaga maqan yahay kooxda arrimo dhaawac, waxaana la sugi doonaa inuu kooxda kasoo muuqdo kulanka ay Atletico Madrid isbuucaan kula ciyaarayaan magaalada Turin.
