Filanwaa Sheeko Jacayl Qaybtii 12aad W/Q: Yaasiin Xasan …
Casar dheer qol ay sii diyaarisay oo si heer sare loo habeeyay, udug badana ka soo carfaayo ayay tidhi soo gal, kaddibna sharaab qabowna soo ag dhigtay.
Maxamed aad ayuu ugu farxay sida wanaagsan ee loo soo dhaweeyay loona maamusay, isagoo dhoola caddaynayaa ayuu u mahadceliyay Deeqa, waxa uuna yidhi:
“Qofka wanaagsani ma qarsoomo” intaa kaddib hilow iyo xiiso badan oo ay isu qabeen, waxay guda galeen sheeko dheer, mudo dhorw saac ah haasaawe iyo sheeko qosol leh xili ay isla jeex jeexeen ayay deeqo maxamed ku tidhi: “Walaalo waan jeclaanlahaa inaad caawo oo dhan ii sheekayso, balse maalmahan waxaa jira rag hubaysan oo xiliyada dambe dadka waddada maraya baadha, markaa walaalo waan kuu baqayaa ina keen aaan ku sii dhaweeyo”.
Maxamed isaga oo maqsuuda ayuu soo istaagay, markay irida guriga marayaan labadoodu ayuu ku dhahay macasalaama, walaalo waad mahadsantay, dabcan guriga ku laabo inshaa’alaah waxba arkimaaye, wuxuu intaa u raaciyey qalad ayaan samaynay, sheekada macaankeeda ayaa inala tagtay, waaban ilownay inaan guriga marti ku ahayn, Deeqa waxa ay damacday ilaa Buundada Geed jacayl in ay sii dhawayso, balse lafaheeda ayuu u baqay, wuxuuna ku yidhi maya dhib malahan iska laabo, marka aan guriga tago ayaan ku soo wici doonaa ee nabad galyo .
Nasiib wanaag dad wada marayay ayuu ku lugdarsaday, waxbana ilaahay ma tusin, durba gurigi ayuu tagay isagoo nabad qabaa, inta uuna dhan kale u leexan ayuu telfoonkii la soo booday oo qolkiisi la galay,kadibna wuxuu Deeqa ka codsaday waxyar ka bacdi inuu soo wici doono.
Deeqa aad ayay ugu faraxday kulankan caawa dhaxmaray iyada iyo Maxamed, wixii ay maanka ku haysay ayaa u rumoobey, hadal iyo haasaawe habeenno badan telfoon lagu wadaagay isfahankii ka dhashay, wuxuu horseeday inay si fool ka fool ah isku arkaan iyada iyo Maxamed.
Isku soo dhawansho aan xuduud lahayni ayaa durba ka curtay barshadan maalmahan yar ku eeg, ee aan cimrigeedu ka badnayn saddex toddobaad oo kaliya.
Maxamed casho iyo cunto midna xiiso umahayn, wax yar kaddib Deeqa ayuu telfoonkii ka wacay, halkaasaana lagasii amabaqaaday haasaawe ubadan kulankoodi isla caawa ahaa iyo sheekooyin kale, waabarigii mar ay tahay ayaa lays maca saalameeyay, jawi farxadeed ayaa lagu kala seexday.
Maxamed si weyn ayuu ula ashqaraaray quruxda Deeqa iyo qiimaha qaadir ku manaysatay, wuxuu aad ula dhacay oo qalbigiisa xusuus filanwaa ku noqotay, xushmada iyo xishood gabarnimo, iyo sida wanaagsan ee loo soo dhaweeyay.
Sidaasi daraadeed Maxamed durba dareen jacayl ayaa galay, waxaa horay loo yiri nin qoyani biyo iskama dhowro, wax hadda u hadhay oo caqabad ku ah inuu xiriir gaara la yeesho wax diidaya majiraan, maadaama uu dabeecadeeda bartay, muuqeeda quruxda badana ubogay, dabacsanaan iyo soo dhaweyn aad u heer sarreysa iyo waliba Isfahan kala kulmay, tallaabada xigta waa sidii loo abuuri lahaa jawi kan hadda ka duwan iyo haasaawe dhab ah.
Dhanka kale Deeqa marnaba maankeeda ma gelin, inuu magaalada joogo wiil sidan u dabeecad wanaagsan, waxay ku noqotay filanwaa, aad ayay ula yaabatay, markii uu ku yiri waligay ma guursan, xitaa qof aan sheeko wadaag nahay ma jiro, waxay is tidhi waa nin ragga oo waxbaa u dabran ugu yaraan waa nin xaas le, laakiin Deeqa ma ogo in qalbiga Maxamed holcaayo oo dakharadii shalay wali diiftoodii ka muuqdaan.
Galabtii xigtay ayaa cabbaar telfoonka lagu sheekaystay, waxaana lagu balamay sidii caadada ahayd caawa, waxaa intaa dheer oo uu Maxamed ka dhawaajiyay inuu doonayo inay caawa arrin gaara ka wada hadlaan haddii uu Eebe idmo, kaddib Maxamed magaalada ayuu u dhaadhacay, wuxuu daawasho u tagay ciyaar ka socotay Garoonka Mujamac Diiba Ex xaradii hore ee Daraawiishta.
Xili maqribkii ah ayuu xaafada ku soo laabtay isagoo aad ugu xiiso qaba codkii dabacsanaa ee deeqa, markuu guriga yimid, nasiib daro Telfoonkii wax shanqadha wuu ka waayay, cilad farsamo owgeed, fiilo ayaa meel kago’day, xiligaana shaqaalihii shirkadu way rawaxeen, yaab…..
Maxamed intuu orday ayuu horay u aaday Baranji wiil ay saaxiibo ahaayeen uu lahaa oo ku yaalay Xaafadda Irid Aamin.
Kaddib xaruntii shirkadda ayuu ka wacay una sheegay in Telfoonka Lambarkiisu yahay ———– aanu shaqaynayn, sababta uu wargaliyayna waxay ahayd in bari lagu daro Telfoonada ciladaysan si galinka hore loogu hagaajiyo, intaa ka bacdi lambarkii Deeqa ayuu garaacay, nasiib daro waxaa ka qabatay qof dumara, salaan kaddib wuxuu waydiiyay deeqa, ma joogto ayaa loogu jawaabay, waxaana loo raaciyay, maandhow Kool dibada ah ayaan sugayaynaa ee mar dambana Telfoonka ha soo garaacin.
Intaa ha inoo joogto lasoco qaybaha dambe.
W/Q: Yaasiin xasan.
