Wasiirka Tiknoolajiyadda JSL Oo Sheegay inay Midaynayaan isku Xidhka iyo Wada Hadalka Shirkadaha Isgaadhsiinta ee Somaliland
Wasiirka wasaarada isgaadhsiinta iyo tiknoolajiyadda Somaliland Dr. Cabdiwali Sheekh Cabdillaahi Suufi Jibriil, ayaa sheegay in ay midayn doonaan isku xidhka iyo wada hadalka shirkadaha isgaadhsiinta ee Somaliland ka hawl gala. isla markaana qof kasta oo taleefan haystaa uu la hadli karo cidda uu doono.
Waxaa kale oo uu intaa ku daray in ay fulinayaan dhammaan waxyaabaha uu jidaynayo xeerka isgaadhsiinta jamhuuriyadda Somaliland ee goleyaasha qaranka ka ansaxay oo ah xeer lambar 50:2014-kii. Xeerkaasi oo uu wasiirku tilmaamay in uu wax badan oo xuquuqda muwaadiniinta ah ka hadlayo.
Wasiirka oo shalay hortagay guddida ilaalinta hantida qaranka ee golaha wakiillada, ayaa markii uu kulankaasi soo dhammaaday, waxaanu yidhi. “Waxa bud dhig iyo aasaas u ah sharciga lagu maamulayo isgaadhsiinta xeerka iskaadhsiinta ee xeer lambar 50, ee baarlamaanku uu ansixiyay sannadkii 2014-kii oo diyaar ah.”
Dr. Cabdiwali Sheekh Cabdillaahi waxa uu intaasi raaciyay “Wasaarad ahaan, diyaar ayaannu u nahay in aanu fulino oo aanu hirgelino, dhamaan waxyaabaha ku qoran xeerkaas. Xeerkaasi waxa uu sheegayaa wax yaabo badan oo xuquuq ah oo dadku leeyihiin, waxaanu xaq u leeyahay qofka macmiilka u ah shirkadaha isgaadhsiintu in uu la hadli karo qofka uu doono.”
“Shirkadaha isgaadhsiintuna arrintaasi waa u diyaar, sida aannu warka ku hayno. farsamadii la iskugu xidhi lahaana gacanta ayaannu ku haynaa. waxa kale oo looga baahan yahay shirkadaha isgaadhsiinta qalabka ay isticmaalayaan in uu noqdo qalabka ay dunidu isticmaasho. adeega ay gudbinayaana waa in uu noqdo mid tayadiisu sarrayso oo markasta la helayo oo qanciya dadka,” ayuu yidhi wasiirka wasaarada isgaadhsiinta iyo tiknoolajiyadda Somaliland Dr. Cabdiwali Sheekh Cabdillaahi Suufi Jibriil.
Wasaarada isgaadhsiinta iyo tiknoolajiyadda Somaliland
