M/WEYNE MUUSE TALAABO ADAG HA KA QAADO WASIIR SACAD IYO WAKIIL BAASHE
Mudo dheer ayaa maamulkii M/weyne Siilaanyo oo ay hormood u ahaayeen Wasiirka Arimaha Dibada Sacad Cali Shire iyo Wakiilka S/Land ee Imaraatka Baashe ay shacabka Somaliland u sheegayeen in dowlada Somaliland heshiis la gashay shirkada DP World si ay u maamusho dekeda Berbera. Ka dib waraysigii uu bixiyay Wasiirul dowlaha Arimaha Dibada ee Imaraatka Dr Anwar Gargash, waxa cadaatay sida wax u dhaceen iyo inaan xaqiiqda laga sheegayn sida heshiishkaa lagu galay.
Si hadaba runta loo ogaado, waxaan ku talin lahaa in M/weyne Muuse Biixi, Golaha Wakiilada iyo Guurtidu soo gole-joojiyaan Wasiir Sacad iyo Wakiilka S/land ee Imaraatka Baashe si su’aalo looga waydiiyo waxay ka ogaayeen arinta dekeda Berbera, laguna cadaadiyo inay runta taabtaan.
Sidoo kale, si aanay u lumin kalsoonidii shacabka Somaliland ku doorteen M/weyne Muuse Biixi oo mudo afar bilood xilka hayay, waxaan aaminsanahay inay la gudboon tahay in M/wuhu uu meel adag iska taago arintan xasaasiga ah, talaabo cadna ka qaado Wasiir Sacad iyo Wakiil Baashe.
La soco; Maalmaha soo socda waxaan soo bandhigi doonaa daraasad aan ku sameeyay saamaynta taban ee masiirka shacabka iyo amaanka qaranka (National Security) Somaliland uu u yeelan doono SALDHIGA MILITARI ee Imaaraatku ka dhisanayo Berbera iyo khataro badan oo kale oo ku xeeran.
Mohamud Sh. Cabdi Geedwareershe
Minneapolis, Minnesota. USA
