Maanso: Ay-garad (Waxa curiyey Yuusuf Cismaan Cabdille “Shaacir”)
Maansadan oo tilmaan ka bixinaysa hoos u dhaca ku yimi af-soomaaliga
waxaa ku jiray erayo badan oo qaarkood la ilaaway
waana dhoola-tus Af-soomaaligu u muujinayo afafka kale waxaanay tidhi
Ururtiyo laxaa sare
Afa gaale Caliyaw
Ninka adhaxda jiilaal
Eegaa maladi jirin
Anna oonka la hashada
Umalkiyo wisiisiga
Waxaan ooda dhacameed
Ashqaraar u kala guray
Oo gadayda laacdiyo
U baxii bilaan jiray
Sidaan ugu abtirin laa
Awinkiyo aswaantiyo
Arahdiyo argeegtiyo
Agedkiyo adeentida
Orobkiyo arbeebiga
Abaajiga asoolka leh
Awsaaxa jiifiyo
Ilma-dhuug kolay tahay
Ardalkiyo amuumkiyo Adamii tilmaanaa
Uus-miirka liitee
Nafta lagu la eertiyo
Abqadiyo Adaahida
Abxidayo adarigii
Iyo aabigeedii
Alamaanku saaraa
Agabaraha geedkiyo
Igmashada fartaaga leh
Ologiyo ardaayada
Axdartiyo asaayaha
Awgiyo ijaabada
Adurtii la odhan jiray
Agloolkiyo anfaaciga
Arooskiyo agliilkii
Ajuurada wadaadkii
Eeraanka dheeraa
Agtilaalki soocnaa
Amihiyo Aboodiga
Axadhiyo akeekiga
Anfariirka jaantiyo
Ayn faadka yaabka leh
Arartiyo hayl hayskiyo
Ilma raga shadeedii
Erayada tasoobiyo
Afku inuu agoon yahay
Aqoon-yahan tilmaamiyo
Abwaan kaama qarinine
Kumaad eer sanaysaa
Ayax guuray eel reeb
Argtida xidaarkiyo
Wax layidhi aftahankii
Aamus buu ku dhawyahay
Bayaxaw odoraskii
Naaf dhaladka eedee
Amin iyo god lays waa
Asa oodan baa jira
Runta aba saxeediyo
Abaraaqa waayaha
Ab-ogaa warkiisiyo
Arnaa’uudka waydii
Ay-garadka sii raac
Eela waynta naaxdiyo
Baydari ugaadhsiga
Ishinkeeda raacdee
Ohligaad jeclaydi iyo
Okholaha halkiisii
Umal baa ka sarakacay
Arootiyo aroorida
Ashkir inuu bariistiyo
Wax layidhi Adeeridu
Dhulka meel aftoolin ah
Kuma uusi shitadoo
Aarmigu ma saacido
Waa Agaali waranlay
Iyo nugul abaareed
Carshintii Aloog iyo
Caliw daranti eexood
Alle waxay ka sugayaan
Cirku in uu mar ooftiyo
Arligoo ku doogsada
Ukulidii dareenkiyo
Uubatays ha joogee
Yaa irdheeyay waayaha
Yaa alooka saanyahay
Aydinkiisa laaciyo
Ijadiisa yaa luray
Arbe waa yaqaanaa
Halkuu oosha mariyoo
Oolimaad diraaceed
Udawayne kuma furo
Aradkana hankaw daran
Garashad abguurtiyo
Agoon waa qofkii madhan
Indhaa aragtidooday
Ilkuhuna waxgooyaan
Aadmigu is qaad qaad
Isagaan abuurtiyo
Aayihiisa faalayn
Damaciisa iibgee
Hadba aag u sii gudub
Nin adduun majeertaa
Indheer-garato maahee
Iimaanki duug noqoy
Asalkiina laga faan
Adduunyada af baa fura
Aqoontana af baa qora
Dhaqankana af baa sida
Dhaxalkii awoow iyo
Isirkana afkaw mudan
Aa saarta duugiyo
Taariikhad aamiga
Afku udub dhexaad iyo
Aqolkooda weeyaan
Ummadana henkeediyo
Ilbaxeeda weeyaan
Ubadkana asluubtiyo
Aayahooda weeyaan
Alif macalin baa dhigay
Iyo awgi waynaa
Keena diidna aashi
Aragtiyo far buu qoray
Galaal aynigiisii
Ummaduu wax uga tagay
Shire-gaab amaan iyo
Ubax baa dulsaaraa
Ka daraa ogayl key
Qoraal loogu iman jiray
Afrax inuu dadaaliyo
Wili orodki muudayn
Gaarriyana astaamaha
Afka waa macnayn jiray
Arbe yaasha qaar iyo
Akhyaartii badh baa maqan
Abaal lugu xusuustiyo
Tixdu waa abaartood
Inta iilka jiiftana
Alle hawgu sama falo
Aamiiiiiiiiin
