Hargeysa (OWN) – Wakiilka cusub ee Taiwan usoo magacowday Somaliland, kadib heshiiskii is-afgarad ayaa Shalay magaalada Hargeysa kulan kula yeeshay Wasiirka waxbarashada Somaliland.
Lou Chen-hwa, Wakiilka Taiwan ee Somaliland ayaa kulan la qaatay Wasiirka iyo mas’uuliyiin ka tirsan wasaarada Waxbarashada iyo Sayniska , iyada oo kulankaasi ku wehlinayay ku-xigeenka wakiilku.
Kulankaasi ayaa Lagaga hadlay iskaashiga labada Dawladood ee waxbarashada, iyada oo si gaar ah diirada loogu saaray sidii ay Taiwan uga caawin laheyd Ardeyda reer Somaliland sidii ay u heli lahaayen deeqo waxbarasho.
Waxaana dhawaan la filayaa in xukuumada Taiwan ay deeqo waxbarasho siiso ardey reer Somaliland ah, kuwaasi oo u safri doona Jasiiradan sheegata inay ka go’day shiinaha.
Somaliland iyo Taiwan ayaa hore u kala saxiixday heshiis iskaashi oo Ay qeyb ka Tahay arrimaha waxbarashadu, midaasi oo shalay si rasmi ah loo bilaabay dar-dar gelinteeda.
Lou Chen-hwa ayaa hore u ahaa wakiilka Taiwan u qaabilsan dalka Sacuudiga, iyada oo dhawaan xili uu ku sugnaa Hargeysa loo magacaabay xilkan cusub ee ka dhashay heshiiska is-afgarad.
