Tartanka FA Cup ayaa maraya meel xaasaasi ah, waxaana shalay semi-finalka iska xaadirisay Manchester United oo si dhib badan kaga adkaaday Norwich City.
Maanta ayay saddexda kooxood ee kale ee kula midoobi doona United wareegga semi-finalku ay caddaan doonaan, marka ay Arsenal u tagto kooxda dhibaatada badan u geysata naadiyada waaweyn ee Sheffield United, Chelsea na ay safarka ugu tagto Leicester City, isla markaana ay Manchester City garoonkeeda ku qaabisho Newcastle United
Lixdan kooxood oo ay laba ka mid ah soo gudbi doonaan, waxay natiijooyinkooda lagu go’aamin doonaa isla maanta in saddex kooxood soo gudbaan.
Xidhiidhka kubadda cagta FA oo beddelay sharcigii FA Cup-ka ee kulanka labaad la ciyaari jiray haddii ay ciyaartu barbar-dhac kusoo dhamaato, waxa hadda labada kooxood ee waqtigooda caadiga ah barbarro ku dhamaysta lagu dari doonaa soddon daqiiqadood oo dheeraad ah, taas oo socon karta illaa la isla gaadho rikoodheyaal.
Sheffield United vs Arsenal
Arteta oo xaaladdu ku xun tahay waxa uu tegi doonaa Sheffield, waana kulanka ugu soo horreeya ee lagu ogaanayo kooxda soo labaynaysa Manchester United ee wareegga semi-finalka u gudbaysa.
Sheffield United oo marti loo yahay way soo wada guuleysatay dhamaan kulamadeedii saddexda ahaa ee ay kusoo gaadhay siddeed dhamaadka, sidaas oo kalena Arsenal ayaa si raaxo leh usoo guuleysanaysay.
Xogta kulanka:
Ciyaarta: Sheffield United vs Arsenal
Tartanka: FA Cup, wareegga siddeed dhamaadka
Waqtiga: 3pm – Saacadda Geeska Afrika
Garoonka: Bramall Lane
Shaxda macquulka ah ee labada kooxood
Sheffield United: Henderson; Basham, Egan, O’Connell; Baldock, Freeman, Norwood, Besic, Osborn; McBurnie, Sharp
Arsenal: Martinez; Maitland-Niles, Sokratis, Holding, Saka; Xhaka, Guendouzi; Nelson, Willock, Aubameyang; Lacazette
Leicester City vs Chelsea
Chelsea oo wali kusii jirta farxadda guushii weynayd ee ay ka gaadheen Manchester City, waxay garoonka King Power Stadium imtixaan ugu maraysaa haddii ay boos ka heli karayso afarta kooxood ee ugu dambeeya.
Laakiin Leicester City oo qaab wanaagsan ku jirta, horyaalkana kaalinta saddexaad ku raaxaysanaysa inkasta oo ay hal dhibic ka horreyso Blues, ayaa dhexda u xidhanaysa sidii ay iskaga xaadirin lahayd semi-finalka FA Cup.
Leicester City iyo Chelsea way soo wada guuleysteen min saddexdii ciyaarood ee FA Cup ay soo dheeleen illaa hadda.
Xogta Ciyaarta:
Kulanka: Leicester City vs Chelsea
Tartanka: FA Cup – Wareegga siddeed dhamaadka
Waqtiga: 6pm – Saacadda Geeska Afrika
Garoonka: King Power Stadium
Shaxda macquulka ah ee labada kooxood
Leicester: Schmeichel; Justin, Evans, Morgan, Fuchs; Perez, Choudhury, Tielemans, Praet, Barnes; Iheanacho
Chelsea: Caballero; James, Christensen, Zouma, Emerson; Gilmour, Jorginho, Kovacic; Loftus-Cheek, Abraham, Pedro.
Newcastle United vs Manchester City
Saddex maalmood kaddib guul-darradii kasoo gaadhay Premier League ee ay Chelsea 2-1 ugu soo garaacday Stamford Bridge, Manchester City waxay ku sugan tahay Newcastle oo ay wareegga siddeed dhamaadka ee FA Cup isku haleelayaan Newcastle.
Pep Guardiola oo kooxdiisu ay difaacanayso koobka, waxay kulankan u arkaan fursad ay koobkoodii labaad ee xili ciyaareedkan ugu guuleysan karayaan, iyagoo Carabao Cup hore usoo qaatay.
Newcastle waxay soo dheeshay shan kulan ka hor intii aanay halkan soo gaadhin, laakiin Man City saddex ciyaarood oo kaliya ayay ciyaartay maadaama ay meel dambe kaga biirtay.
Saddex guulood iyo laba barbaro ah ayaa Newcastle ay soo xoogsatay, halka City ay dhamaan kulamadeedu guulo wada ahaayeen.
Xogta Kulanka
Ciyaarta: Newcastle vs Man City
Tartanka: FA Cup, wareegga siddeed dhamaadka
Waqtiga: 8:30 pm – Saacadda Geeska Afrika
Garoonka: St James’ Park
Shaxda macquulka ah ee labada kooxood
Newcastle: Darlow; Yedlin, Schar, Lascelles, Fernandez, Rose; Almiron, Hayden, Shelvey, Saint-Maximin; Carroll
Man City: Ederson; Cancelo, Otamendi, Garcia, Zinchenko; De Bruyne, Rodri, D Silva; Bernardo, Jesus, Sane
