Daawo laga sameeyay dhiigga nin 200 oo jeer ay masas halis ah qaniineen

Dhiigga nin Maraykan ah oo si bareer ah isku durayay sunta abeesooyinka muddo ku dhow labaatan sano ayaa keentay in la sameeyo dawo “aan kuwii hore la mid ahayn” sida ay saynisyahannadu sheegeen.

Unugyada difaaca jirka ee laga helay dhiigga Tim Friede ayaa muujiyey inay ka ilaalinayaan sunta dilaaga ah ee noocyada kala duwan ee xayawaanka.

Daawaynta hadda jirta waa inay la jaanqaadaan noocyada gaarka ah ee maska ​​sunta ah ee qof kasta uu qaniinay. Laakiin isku dayga Mr Friede ee 18-ka sano ah wuxuu noqon karaa tallaabo muhiim ah oo lagu helayo dawo caalami ah oo ka dhan ah dhammaan qaniinyada masaska – kuwaas oo dila illaa 140,000 oo qof sannadkii iyo dad saddex jeer ka badan u baahan in xubnaha qaar la gooyo amaba noqda naafo joogto ah.

Guud ahaan, Mr Friede waxa uu u adkaystay in ka badan 200 oo qaniinyo ah iyo in ka badan 700 oo cirbadood oo sun ah oo uu ka diyaariyey qaar ka mid ah masaska ugu xun adduunka, sida kobraha.

Waxa uu markii hore rabay in uu dhiso difaaciisa si uu isu ilaaliyo marka uu qabanayo masaska, isaga oo kusoo bandhigaya bartiisa YouTube.