Guddida Ruqsad-bixinta iyo Ashax-marinta Qareenada Somaliland Oo Gudoomiye Cusub Doortay
Hargeysa (OWN)- Guddiga heer qaran ee u xil-saaran Ruqsad-bixina iyo Anshaxa Qareennada Somaliland, ayaa shir ay maanta isugu yimaaddeen ku doortay Hoggaanka Cusub ee labada sanno ee soo socda majaraha u hayn doona Guddiga.
Kulanka oo uu shir-guddoominayey Wasiirka Wasaaradda Cadaaladda Somaliland isla markaana ay goob-joog ka ahaayeen Xubnaha guddigani ka kooban yahay, waxa guddoomiye loogu dooray Garyaqaan Maxamed Cismaan Xasan (Cigaal) oo ka tirsan Ururka Qareennada ee Somaliland.
Xubnaha Guddiga heer Qaran ee Anshax-marinta iyo Ruqsad-bixina Qareennada Somaliland, ayaa ah guddi isku dhaf ah oo ka kala yimi qaybaha kala duwan ee hay’adaha sharci-dejinta iyo Garsoorka dalka.
Guddiga Ruqsad-bixinta iyo Anshax-marinta Qareenada Somaliland, ayaa kooban Toddoba Xubnood oo ay soo kala magacaabaan Wasaaradda Caddaaladda, Maxkamadda Sare ee Dastuuriga ah, Labada Gole Baarlamaan ee Guurtida & Wakiillada iyo Ururka Qareennada Somaliland.
Guddoomiyaha Cusub ee la doortay Garyaqaan Maxamed Cismaan Xasan Almis (Cigaal), ayaa labada sanno ee soo socda hoggaamin doona Guddiga Ruqsad-bixinta iyo Anshax-marinta Qareennada Somaliland.
