In ka badan 700 oo hal shirkad shaqaale ka ah ayaa matag iyo shuban bilaabay kadib cunto ay shirkadoodu siisay
In ka badan 700 oo ka mid ah shaqaalaha shirkadda diyaaradaha ee Airbus Atlantic ayaa la rumeysan yahay inay xanuunsadeen ka dib cashadii ciidda Kirismaska ee shirkadda, mas’uuliyiinta caafimaadka ee Faransiiska ayaa sheegay.
Shaqaale ka socda goobta kooxda hawada sare ee galbeedka Faransiiska ayaa hor iyo gadaal noqday, sida ay sheegtay wakaaladda caafimaadka ee ARS.
Ma cadda waxa ku jiray cuntada ee damaashaadka ciidda u badalay argagaxa.
Airbus si degdeg ah ugamay jawaabin codsigii BBC ee ahaa in ay faallo ka bixiso waxa dhacay.
Airbus Atlantic waa qayb ka mid ah shirkadaha sameeya diyaaradaha ugu weyn aduunka ee Airbus, waxaana ka shaqeeya 15,000 oo qof oo ku kala nool shan wadan.
ARS ma aysan bixin tafaasiil ku saabsan waxa saxda ah ee keenay in dadku ku bukoodaan cashadii, taasoo dhacday usbuucii hore, laakiin waxay sheegtay horaantii jimcaha in dadka wax cunaya lagu arkay “shuban iyo matag”.
Waxaa socday baaritaan lagu raadinayo halka ay ka timid cuntadan ay dadka badan ku sumoobeen, sida ay hay’addu u sheegtay wakaaladda wararka ee AFP.
Kooxda ballaaran ee Airbus waxay shaqaaleysiisaa 134,000 oo qof waxayna soo saartaa alaabooyin iyo adeegyada diyaaradaha, helikabtarrada, difaaca, hawada sare iyo warshadaha amniga.
Dhacdo kale oo ka dhacday Faransiiska horaantii sanadkan, tiro dad ah ayaa ku xanuunsaday halka muwaadin Giriig ah uu dhintay, ka dib markii uu ku dhacay cudurka botulism ee naadirka ah, tan oo ka dhalatay cuntada ee maqaayad ku taal Bordeaux.
