Dagaal Ba,an oo ka Socda Qaybo ka Tirsan Gobolka Baay ee Dalka Somalia
Baydhabo (OWN) – Warar kala duwan ayaa ka soo baxaya weerar ku bilowday qaraxyo oo saaka Al-Shabaab ay ku qaadeen salldhig ku yaalla deegaanka Goofgaduud Buurey oo 30 KM bari ka xiga magaalada Baydhabo ee xarunta gobolka Baay.
Saldhigga la weeraray waxaa si wadajir ah u degan ciidamada dowladda iyo kuwa maamulka Koonfur Galbeed Soomaaliya.
Wararka ayaa sheegaya in haatan dagaal u dhexeeya labada dhinac uu ka socda halkaasi, kaas oo la’isku adeegsanayo hubka noocyadiisa kala duwan.
Sidoo kale wararku waxay intaasi ku darayaan inuu jiro khasaare dhamasho dhaawacba leh, balse ma cadda illaa iyo hadda inta uu gaadhsiisan yahay.
Dhinaca kale Al-Shabaab oo war ka soo saaray weerarkan isla markaana sheegay inay la wareegeen saldhigga deegaanka Goofgaduud Buurey ee gobolka Baay.
Xaaladda ayaa haatan aad u kacsan, waxaana weli socda dagaal u dhexeeyay ciidamada dowladda, kuwa Koonfur Galbeed oo dhinac ah iyo dagaalyahanada Al-Shabaab.
