Gudoomiyaha golaha wakiilada JSL oo ku wajahan magaalada Hargeysa
Gudoomiyaha golaha wakiilada Cabdirisaaq Khaliif ayaa ku wajahan magaalada Hargeysa,isaga oo ka soo laabtay safar uu ugu maqnaa dalka Turkiga.
Gudoomiye Khaliif oo ah masuulka ugu sareeya ee reer Sool ah kaas oo xil ka haya Somaliland ayaa soo laabashadiisu ku beegmaysaa wakhti ay wali taagan tahay xiisada ka aloosan Laascaanood, waxaana la dhawrayaa doorka ay xukuumadu ka siiso xal u helida xaalada ka taagan gobolkiisa.
Muuse Biixi waxa uu dhawaan safar ku tagayaa wadanka imaaraadka oo wax ka waydiinaya sababta Itoobiya looga saaray saamigii ay ku lahayd maalgashiga dekeda Berbera.
Wararku waxay sheegayaan in Muuse Biixi lagala hadlayo sidii loo soo celin lahaa saamiga ay Itoobiya ku lahayd dekeda Berbera, Dubai ayaana ku doodaysa in Addis Ababa la siiyo kaalinteeda si aanay dekeda Berbera u lumin suuqa ugu weyn ee ay haysato oo loo arko dalka Itoobiya.
Saraakiil ka tirsan ciidamada maraykankuna waxay kormeer ku tageen dekeda Berbera oo ay u kuurgaleen xaaladeeda iyaga oo ka fiirsanaya qorshe ay fulinayaan bisha danbe.
Saraakiishan oo ka socday ciidanka Isku-dhafka ah ee Maraykanka ee geeska Afrika ee loo soo gaabiyo (CJTF-HOA), ayaa ujeeddadiisa lagu sheegay In ay tahay indho indhayn la xidhiidha dhoola tus caalami ah oo Ciidamada Mareykanku ka samaynayaan waddamo ay Somaliland ku jirto oo ay ka mid yihiin Botswana, Djibouti, Kenya, Rwanda, iyo Uganda.
Muuse Biixi waxa uu baajiyey wefti ka socda dalka Maraykanka oo doonayey inay Somaliland u yimaadaan khilaafka ka taagan arimaha doorashooyinka.
Wararku waxay sheegayaan in Muuse Biixi uu weftiga maraykanka ku wargeliyey inay dib u dhigaan safarkooda isaga sheegay inay jiraan hawlo qabyo ka ah oo ay fulinayaan daneeyayaasha doorashooyinka Somaliland, kuwaas oo aanu si cad u shaacin.
