“Hadraawi Waa Shakespear-Ka Somaliland, Somaliland Waa Qarankii Gabayga…” Marry Harber.

Saxafiyadda Caanka ah ee Marry Harber , ahna qoraa ka tirsan idaacadda Bbc-da qaybta Ingiriisida ayaa booqasho ay ku timid Somaliland waxa ay wax kaga qortay Abwaanka dhulka Somalida caanka ka ah ee Maxamed Ibraahim Warsame Hadraawi oo ay kula kulantay dalka.

Waxaanay Marry Harber qoraalkeeda ku bilawday ” Hargeysa waa caasimadda Jamhuuriyadda iskeed isu magacawday ee Somaliland, qof kastaana waa yaqaanaa Abwaanka Qaranka ee caanka ah ee Hadraawi, waxaanay ugu yeedhaan Shakespear,waxa uu shaqaynaayey 50 sanno ee ugu dambeeyey,isaga oo ka hadlaayey Jacaylka,Xoriyadda,Cadaaladda iyo Nabadda”.

Waxa ay tilmaantay in gabayadda Maxamed Ibraahim Warsame Hadraawi ay yihiin kuwo laga helaay dhinac kasta oo nolosha ku saabsan , sida Siyaasadda, Jacaylka, iyo Nabaddaba, sidoo kalena laga dhex arkaayo nolosha Somalida..

Waxa ay sheegtay in uu Abwaanku dhashay sannadkii 1943-kii, isaga oo ku dhashay dhulka Miyiga ah , kana dhashay dad Geel dhaqato ah,waxa kale oo ay qoraalkan ku xustay xadhigii kala duwanaa ee ay dawladdii Maxamed Siyaad Barre u geystay abwaanka sanadkii 1973-dii.

Iyada oo tilmaantay in lagu xidhay Kacaan diidnimo, sidoo kalena jeelka la dhigay iyada oo aan wax maxkamad ah la soo taagin, isaga oo markii dambena ka shaqeeyey arrimaha Nabadda.

Waqtigan Abwaan Hadrawi waa 70 sanno jir , waxaanu ku nool yahay Somaliland, isaga oo hadda ku nool dhul rooban , kadib saddex sanno oo ay jamhuuriyadda Somaliland soo martay abaaro adkaa.

Somaliland ayaa ah dal aan adduunka laga aqoonsanayn,kadib markii ay xaaladdo nabad gelyo ka dhaceen Koonfurta Somaliya .

Marry Harber waxa ay sheegtay in ay sannado badan oo gaadhaaya 25 sanno qoraalo ka samaynaysay Somaliland, iyada oo intaas ku dartay in Somaliland tahay Qarankii Gabayga , taas oo laga heli karo dad badan oo gabyaa ah.