Ururka Alshabaab iyo Ciidamada Kenya oo ku Dagaalamay Nawaaxiga Gaarisa
Gaarisa (OWN) – Gobolka Waqooyi Bari ee Kenya waxaa laga soo sheegayaa in dagaal uu halkaas ku dhexmaray ciidamada ammaanka Kenya iyo xoogagga Al-Shabaab, kadib qarax halkaas ka dhacay.
Nick Ndalana oo ah Taliyaha Booliska gobolka Waqooyi Bari ayaa sheegay iney dagaal kula galeen Al-Shabaab ismaamulka Gaarisa.
Warbaahinta Kenya ayaa qirtay in qarax dhulka lagu aasay lala eegtay gaafhi ay wateen ciidamada amaanka dowladda Kenya, walow ay sheegeen ineysan waxba gaadhin, kadibna waxaaa xigay iska horimaad dhacay.
“Ciidmada waxey heleen macluumaad ku saabsan in kooxda ay halkaas joogaan, waxey ku jireen roondo, rasaas ayey kusoo fureen ciidanka markii ay ogaadeen in gaadhigu ka badbaaday qaraxa,” ayuu yidhi taliyaha booliska.
Taliyaha Booliska wuxuu sheegay ineysan soo gaadhin khasaare nafeed, walow dadka deegaanka ay ka sheegeen iney waxyeelo ku arkeen gaadhiga ay wateen ciidamada oo sida la aaminsan yahay inay haleeshay rasaastii la is weydaarsaday.