Maaraynta Isku-buuqa Qaybta kowaad
Maaraynta Isku-buuqa (Stress Management)
Qaybta: 1aad
Caalamkan casriga ah, dhallinyarada waxa ugu badan ee ay la kulmaan ayaa ah; isku buuq ka dhasha waayaha ku adag ee ku xeeran noloshan casriga ah.
waxa aad u batay baahiyihii qofku qabay, sida shaqada, lacagta, sumcadda, samaysashada qoys, xorriyadda, horumarka, hoggaaminta iyo guulaha kale ee nololeed ee qofku inta uu nool yahay gaadhi karo.
Maxaa keena xaaladdan?
1: Qofka oo la kulma xaalad shaqo la’aan, taas oo sababaysa in aanu qofku iskii u noolaan karin ilaa uu cid kale ku tiirsanaado mooyaane
2: Qofka oo la kulma guuldarro ka soo wajahda dhanka shaqada, waxbarashada, han uu leeyahay, qoyska, asxaabta iyo dhammaan hawlaha nololeed ee uu ku fooggan yahay
3: Qofka oo uu qalbigiisu ka dheeraado Illaahay (S.W) kana gaabiya waajibaadka Alle dusha ka saaray Aadmiga
4: Qofka oo iska indho-tira xaqiiqada nolosha uu ku sugan yahay
5: Qofka oo isticmaala noocyada kala duwan ee balwadaha, sida daroogooyinka kala duwan
6: Qofka oo la tacaalaya dhibaatooyin dhanka qoyska ah oo uu la nool yahay, waxbana aanu ka qaban karin
7: Qofka oo aan ku qancin qadarta haleesha, rumaynteedana iska diida
8: Qofka oo doona wax ka badan waxa uu u qalmo ee uu istaahilo in uu helo
9: Qofka la saaxiiba asxaab fikirro khaldan la nool
10: Qofka oo uu ka khalkhalo qorshaha hamigiisa nololeed
11: Qofka oo yeesha caadooyin wax u dhimaya waxsoosaarkiisa shaqsiyeed
12: Qofka oo ku nool qaab nololeed aan horumarkiisa ka shaqaynayn
13: Qofka oo waaya xorriyaddiisa
14: Qofka oo la kulma fadeexad sumcaddiisa dhaawacaysa
15: Qofka oo aan samir iyo adkaysi u lahayn duruufaha uu la nool yahay ama la kulmi doono
16: Qofka oo inta ugu badan ka fikira nolosha mustaqbalka
Dhammaan qodobadan iyo kuwo kale oo badani, waxa ay sabab u noqdeen in dhallinyaro badani, nolosha la noolaato fikirro murugo ku dhisan iyo quus; kuwaas oo ugu danbaynta keena in uu qofkaasi toos uga dhaco sallaanka nolosha oo uu is dhiibo.
La soco qaybaha danbe….
#Tudhaale2020
La wadaag asxaabtaada!
Xamse Siciid Maxamed “Tudhaale “
