Taliban iyo Mareykanka Oo Wada-hadallo Ku Leh Magaalada Doha

Taliban ayaa diyaar u ah inay xabad-joojin 10 maalmood ah la gaaraan ciidamada Mareykanka, haddii ay heshiis ay la gaaraan wada-xaajoodayaasha Mareykanka ee ay wada-hadalka kula leeyihiin Doha.

Taliban ayaa sidoo kale diyaar u ah inay yareeyaan rabshadaha ka dhanka ah ciidamada Afghanistan, islamarkaana ay wada-xajaood la yeeshaan saraakiisha dowladda Afghanistan.

Haddii heshiis noocan ah la gaaro, waxay dib usoo nooleyn kartaa rajadii laga qabayo xal waara oo laga gaaro dagaalka Afghanistan.

Taliban iyo wada-xaajoodayaasha Mareykanka ayaa Arbacadii iyo Khamiistii kulmay, si ay uga wada-hadlaan saxiixa heshiis nabadeed, waxaa sidaas sheegay afhayeen u hadlay xafiiska Taliban ee Qatar.

Wada-hadallada waxay ahaayeen “kuwa miro dhal ah”, waxayna sii socon doonaan maalmo, sida uu sheegay afhayeen Suhail Shaheen, oo qoraal soo dhigay twitter,

Madaxweynaha Mareykanka ayaa wada-hadallada joojiyey bishii September kadib markii weerar ay fuliyeen Taliban lagu dilay askari Mareykan ah.