Dawladda Federaalka ahi Awood Uma laha inay ka hortagto Cashuurta ay Alshabaab ka qaado shacab,, Wasiir Bayle

Cabdiraxmaan Ducaale Beyle, Wasiirka Maaliyadda Somaliya ayaa waxaa uu ka hadlay lacagaha canshuuraha, ee maleeshiyada Ururka Al Shabaab ka qaadaan ganacsatada Magaalada Miuqdisho.

Wasiirka Maaliyadda Somaliya ayaa qiray inaanay Dowladda Federaalka Somaliya lahayn awood ay kaga hortaggi karto canshuuraha, ay maleeshiyada Shabaabku ka qaadaan ganacsatada Muqdisho.

Dowladdu ma lahan awood weyn oo ay ugaga hortagto Al Shabaab inay ganacsatada lacago canshuur ah ka qaataan, dadka u ururiya canshuurta Al Shabaabna magaalada ayay si xor ah isaga dhex maraan. Ayuu yiri Wasiirka Maaliyadda.

Wasiirka oo la hadlay Wakaaladda Wararka ee Washington Post ayaa caqabadda jirtaa ku sheegay hal arrin, taasoo ah in Shabaabku ay Soomaali yihiin, isla-markaana ay ku muuqaal yihiin dadka Soomaaliyeed.

Caqabaddu waa hal arrin oo keliya, Al Shabaab waa Soomaali aniga oo kale ama dadka oo dhan, waan isu muuqaal egnahay, meel walbana waa jooggaan oo way nagu dhex jiraan. Ayuu yiri Wasiir Beyle.

Qaar ka mid ah ganacsatada oo iyaguna la hadlay Washington Post ayaa sheegay inaanay Shabaabka u diidi karin lacagaha ay siiyaan, haddii kalena ay dili doonaan.

Ganacsatada qaar ee Shabaabku canshuuraan ayaa waxaa la sheegay inaanay xitaa Dowladda Federaalku canshuurin.