Ku dhawaad 50 ka mid ah dagaalamayaasha Al-shabaab oo lagu dilay gobolka Jubbada Hoose
– Warar dheeraad ah ayaa kasoo baxaya howlgal qorsheysan oo ciidanka Kumaandooska Danab ay ka sameyeen saacadahii lasoo dhaafay deegaanka Yaaq dabey oo ka tirsan gobolka Jubbadda Hoose.
Howlgalka ayaa la sheegay in ciidanka Kumaandooska Danab ay ku dileen ilaa 47 xubnood oo ka mid ah dagaalyahanada kooxda Al-shabaab, sida uu warbaahinta dowladda u xaqiijiyay taliyaha Ururka 5-aad ee Kumaandooska Danab Carab Dheeg Axmed.
Taliyaha Carab Dheeg Axmed ayaa sidoo kale sheegay in ciidamada ay halkaasi ku bur buriyeen fariisimihii kooxda ku lahaayeen deegaanka Yaaq dabayl ee gobolka jubadda hoose.
“Ciidanka kumaandooska danab gaar ahaan Ururka 5-aad ayaa howlgallo sifayn ah kawada gobolka Jubadda hoose , howlgaladdas waxaa dhulka howdka ah looga saarayo khawaarijta ku dhuumaalaysanaysa si looga hortago dhagaraha ay u soo maleegaan shacabka soomaaliyeed” ayuu yiri Taliye Carab Dheeg Axmed.
Howlgalkaan ayaa kusoo beegmaya, iyadoo ciidamada dowladda Fedaraalka Soomaaliya ay kordhiyeen weerarada ka dhanka ah Al-shabaab ee lagu doonayo in guud ahaan dalka looga saaro Ururka Al-shabaab.
