Dab Qabsaday Hotel Shaam oo ku yaalla xaafada badhtamaha Suuqa weyn ee Hargeysa

Ciidanka ayaa ku guuleystay xakamaynta iyo Daminta dabkaas oo ahaa mid ku fidaayey fooqa intiisa kale,mana Jirin khasaare dhaawac iyo dhimasho ah oo uu dabkani sababay.

Dabka ayaa ka bilaabmay dabaqa hoose ee dhismaha waxaana dabku qabsaday qol ka mida,Ilaahay mahadii ciidanka oo adeegsanaya qalabka iyo xirfada la dagaalanka dabka ayaa ku guuleystay bakhtiinta dabkaas, sidoo kale waxay ciidanku dabkaas ka xakameeyeen fooqa intiisa kale iyo ganacsiyadii u dhawaa.

Sababta dabkan dhalisay waxaa gacanta ku haya ciidanka laamaha baadhista Booliska.

Ciidanka Booliska ayaa iyaguna dhankooda hawlgalkaa ka qayb qaatay, waxaana had iyo goor Ciidanka Booliska JSL si dhakhso ah u yimaadaan goobaha hawlgalada dabku ay ka dhacaan, iyagoo suga amaanka goobta, Isla markaana ka ilaaliya in goobtaas hawlgalka laga wado buuq ka dhasho.

Hawlgalkan waxaa ka qayb qaatay ciidanka Dab-demiska Taliska guud waxaana loogu gurmaday Afar Gaadhi oo Dab-demis ah.

Ciidanka Dab-demisku wuxuu darawalada halkan ka farayaa in darawal kasta oo hor istaaga caqabadna ku noqda gurmadka inuu mutaysan doono ganaax iyo xadhig, waxaana ciidanku ku adkaynayaa wadayaasha in marka ay maqlaan hoonka gaadiidka ay dariiqa furaan.

Sidoo kale ciidanku wuxuu iyagana ku wargelinayaa bulshada inay ka waantoobaan goobaha dabka laga daminayo inay ku soo buuqaan xanibaana hawlgalka ciidanka.

Ugu dambayn ciidanku wuxuu halkan fariin uga dirayaa dhismayaasha dabaqyada inaan la dhigin alaabo iyo waxyaabo kale toona salaamada hoostooda, taasi waxay keeni karaan ama sii hurin karaan dabka.