Mid Ka Mida Xaasaska Madaxweyne-Ku-Xigeenka Imaaraadka Oo La Baxsatay Malaayiin Dollar
Haweeney ka mid ahayd xaasaska Sheekh Maxamed Bin Rashiid Al-makhtuum oo ah Madaxweyne-ku-xigeenka iyo Ra’isul-wasaaraha dalkaasi iyo Xaakimka Imaaradda Dubai ayaa la sheegay inay ka baxsatay dalkaasi.
Haweeneydan oo lagu magacaabo Amiir Haya Bintu Xuseen ayaa waxaa la sheegay inay magangelyo ka doonayso Europe, islamarkaasna ay la socdaan 2 carruur oo ay u dhashay Sheekh Maxamed Bin Rashiid Al-makhtuum.
Warbaahinta The Daily Beast ee dalka Maraykanka waxay qortay in Amiirada Haya Bintu Xuseen oo ay isku aabe yihiin Boqorka dalka Urdun, Cabdalla Xuseen Bin Dalaala ay la sheegay inay la baxsatay wiilkeeda oo 7-jir ah iyo gabadheeda oo 11-jir ah.
Amiiradda oo haatan 45 jir ah waxaa la sheegay inay u baxsatay dalka Jarmalka, iyadoo horey u sii qaadatay lacag ka badan 30 million oo Dollar, si ay nolol cusub ugu bilowdo.
Dowladda Jarmalka waxaa lagu tuhunsan yahay inay ku gacan-sayrtay codi uga yimid saygeeda, Sheekh Maxamed Bin Rashiid Al-makhtuum, kaasi oo dalbaday in xaaskiisa iyo carruurtiisa dib loogu soo celiyo magaalladda Dubai.
Diidmadaasi ayaana laga yaabaa inuu xiisad Diplomaasiyadeed ka dhex abuuro dowladaha Jarmalka iyo Imaaraadka Carabta.
