Maxaa Kajira Wefti Madax-dhaqameedyo, Ganacsato iyo Siyaasiyiin Reer Somaliland Oo Puntland Gaadhey + Kulanno ay Layeesheen Madax-dhaqameedyo Reer Puntland Iyo Siyaasiyiin Federaalka Somaliya Katirsan.

 

 

Ceerigaabo(OWN) Wararka nagasoo gaadhaya dhinaca Puntland in badan oo bulshada ahina maalmahanba hadal haysey ayaa sheegaya in wefti isugu jira Madax-dhaqameedyo, Ganacsato iyo Siyaasiyiin Reer Somaliland ah oo ka boqoolay magaalada Hargeysa ay  toddobaadkan dhammaadkiisii gaadheen magaalada Garoowe ee Caasimadda u ah Maammul-goboleedka Puntland.

 

 

Waxana Weftigan oo sida lasheegayo kakooban toddoba xubnood magacyadoodana lagu kala sheegay Suld-Maxamuud Guuleed Mire, Suld-Maxamuud Xaaji Xuseen, Mr-Oday, laba Ganacsade oo kala ah Ina Caydiid iyo Ina Baane, iyo weliba laba Professoor ay kulanno la yeesheen Siyasiyiin iyo Madax-dhaqmedyo ay kamid yihiin Madaxweynihii hore ee Puntland C/raxmaan “Faroole” kana mid ah xilligan xubnaha  aqalka sare ee Dawladda Federaalka Somaliya oo isagu sida lasheegay weftigani halkii ay degganaayeen kaga qaaday laba baabuur oo ah nooca aan rasaastu karin islamarkaasna geeyey guriga uu ka deggan yahay magaalada Garoowe halkaasoo weftigani kula kulmeen xubno Madax-dhaqameedka Reer Puntland ah oo ay kamid yihiin Suld-Siciid Maxamuud Garaase, Suld-Ciise, Garaad-Saleebaan, iyo weliba Mid kamid ah Ugaasyada beelaha Puntland.

 

Waxana wararka qaarkood sheegayaan in weftigan Reer Somaliland iyo xubnaha Siyaasiyiinta iyo Madax-dhaqameedka ahi ay ka wada hadleen fududaynta arrimaha isusocodka bulshooyinka iyo ganacsiga khuseeya qaar kamid ah shirkadaha waaweyn ee Reer Somaliland.

Halka wararka qaarkoodna tibaaxayaan inay ka wada hadleen arrimaha nabadaynta colaadaha ka aloosan Tukarraq iyo meelo kale.

 

Waxana wararka  warbaahinta qaarkeed lagu baahiyey sheegayaan inaan aanay kulannadaasi ka dhalan wax is af-garad ah oo kusaabsan arrimaha laga wada hadlay, ayna dib usoo laabteen weftigii Reer Somaliland.

 

Wararka ay helayso Puntlandnews ayaa sheegaya in odayaasha dhaqanka iyo waxgaradka gobolada Sool, Sanaag iyo Cayn ay diideen qorshaha waftigaan kayimid Soomaaliland ee ah inuusan dhicin wax dagaal ah”. Sidaas waxa lagu sheegay war cinwaankiisu yahay Waftigii Somaliland oo Garoowe Wajigabax Kala Kulmay iyo Dhaqanka SSC oo Albabaabada Ka Xirtay. oo maanta oo Jimce ah lagu baahiyey Shebekedda Wararka Puntlandnews.com

 

Waxana sidoo kale warkaasi intaas kusii daray “in odayaasha dhaqanka iyo waxgaradka gobolada Sool, Sanaag iyo Cayn ay diideen qorshaha waftigaan kayimid Soomaaliland ee ah inuusan dhicin wax dagaal ah” iyo weliba “Odayaasha dhaqanka gobolka Nugaal ayaa sidoo kale u sheegay dhinac kale in taladu marka madaxda laga yimaado ay ka go’do waxgaradka Sool aysana rabin Soomaaliland wadahadalkuna kaliya ku imaan karo Soomaaliland oo ka baxda gobolka Sool”.

 

Skastaba ha ahaatee inkastoo aanay jirin wax xaqiiqo rasmi arrintan kusaabsan ah oo kasoo baxay ama laga helay dhinaca xubnaha weftiga Somaliland ka tegey haddana waxa xusid mudan in muddooyinkii ugu danbeeyey dhinaca Somaliland ay denbi ka ahayd weftiyo noocan oo kale ah oo Puntland u taga arrimo Xukuumadda Somaliland khuseeya ayna jireen xubno madax-dhaqameed iyo siyaasiyiin xabsiyo loogu xukumay arrintaas darted iyo qaar cafis loo fidiyeyba.

Sidaasi awgeedna haddii arrintani dhab tahay waxa la eegaaba waa tallaabada jawaabta ah ee Xukuumadda Somaliland ay ka qaadi doonto arrintaas

Oodweynenews.com/Ceerigaabo

home

Related Articles

Back to top button

Adblock Detected

Please consider supporting us by disabling your ad blocker