Faah-faahinta shirka Isu-tagga Imaaraatka Carabta ee looga hadlayo amniga Soomaaliya
Madaxweynaha dowladda Federaalka Soomaaliya Xasan Sheekh Maxamuud ayaa dalka Isu-tagga Imaaraatka Carabta kaga qeyb galay Shir ku saabsanaa Amniga Soomaaliya oo ay ka qeyb galeen dalalka sida dhow u taageera amniga dalka, kuwaas oo ay ka mid yihiin Imaaraadka Carabta, Qatar, Mareykanka, UK iyo Turkiga. Sida lagu baahiyay bogga Villa Soomaaliya.
Shirka ayaa lashegay in lagu lafa guray sidii dowladda Soomaaliya looga taageeri lahaa dagaalka ay kula jirto Al-shabaab.
Villa Soomaaliya ayaa tibaaxday in madaxweyne Xasan Sheekh uu adkeeyay muhiimadda ay leedahay ilaalinta xasilloonida gobolka iyo in laga fogaado wiiqidda guulihii adkaa ee laga soo hoyey dagaalka ka dhanka Al-shabaab.
Soomaaliya ayaa sannadihii u dambeeyay sare u qaadday dagaalka ka dhanka kooxda Al-shabaab.
Shirkaas ayaa ku soo aaday maalmo kadib markii cunaqabateynta hubka laga qaaday Soomaaliya, waxaana loga hadlay sidii Soomaaliya looga taageeri lahaa in ay isku filnaasho amni gaarto, iyadoo loo marayo dhismaha iyo qalabeynta Ciidamada Qalabka Sida.
