Xisbullah oo sheegtay inay weerartay ciidamada israa’iil oo ku sugnaa xadka
Kooxda Xisbullah ayaa sheegtay in subaxnimadii Talaadada maanta ay weerartay ciidamada israa’iil oo ku sugnaa magaalada Metula oo ku taala xadka ay wadaagaan Israa’iil iyo Lubnaan.
Waxay sheegeen inay ku weerareen gantaallo. Waaxda difaaca Israa’iil ayaa sheegtay, in ay ka hor tageen qaar kamid ah gantaallada ay soo tuurtay Xisbullah halka kuwa kalena ay sheegeen inay ku dhaceen aagag cidlo ah.
Shalay ayay milatariga Israa’ii shaaciyeen in aagagga ka ag dhow magaalooyinka Metula, Misgav Am, iyo Kfar oo ku yaala waqooyiga Israa’iil ay yihiin goobo “ka caagan milatariga”, iyagoo mamnuucay in la aado goobahaas.
