Xisbiga ODP oo Caddeeyey in Sharciga la Horgeynayo Dad ku Lug Lahaa Dilal ka Dhacay Gobolka Oromiya
Golaha Dhexe ee xisbiga Oromada ee ODP, ayaa ballan-qaaday inay ciqaabi doonaan dad ay ku eedeeyeen inay masuul ka yihiin dil iyo barokac ka dhacay meelo kala duwan oo ku yaalla dowlad deegaanka Oromada Itoobiya.
Siday baahisay Warbaahinta Itoobiya, waxa war-saxaafadeed ka soo baxay xisbiga Oromada Itoobiya lagu caddeeyey in sharciga la horgeyn doono dadkii abaabulay dilal iyo barokicin ka dhacday dhowaan deegaanno ku yaalla gobolka Oroomiya.
Golaha Dhexe ee xisbiga ODP waxay intaas ku dareen inay si dhow ula shaqeynayaan dadweynaha deegaankaas, si loo adkeeyo ammaanka isla markaana looga hortago barakac ka dhasha xasaradaha gobolkaas ka oogmay.
War-saxaafadeedka xisbiga Oromada Itoobiya waxa lagu xusay in tallaabo adag laga qaadi doono ashkhaasta sida xun u adeegsaday awooda dowladda oo kaalin ku lahaa dilal ka dhashay qulqulatooyin gobolka Oromiya ka dhacay.
