Oodweyne News - Latest Somali News Update

(Addoonka u fiican) Curiye: Cabdiraxmaan M. Cali Ubaxle

Maansada “Addoonka u Fiican” waxa ay soo baxday 18-ka bishan toddobaad ee 2016. Waa maanso nebi-ammaan ah, oo ka hadlaysa Shamacii adduunyadan shaaca looga qaaday. Si qotodheer ayuu halabuurku u soo bandhigayaa waxa uu mudan yahay nebigeennu (N.N.K.H.), iyo kaalinta uu kaga jiro bulshada uu Weyne abuuray–tan iyo intii la alkumay adduunyada. Halabuurku, waxa uu xusayaa isbaddalkii nololeed, aqooneed iyo fikireed ee ku dhacay adduunka tan iyo markii la soo saaray nebi Muxammad (N.N.K.H.), iyo sidii uu ugu hiishay: dulmanihii, agoontii, haweenkii, carruurtii iyo guud ahaan xaqii iyo sinnaantii bulshada. Maansadu waxa ay in badan ku dheeraanaysaa sifooyinkii wanaagsanaa ee uu lahaa nebigeennu (N.N.K.H.), iyo sida uu ugu ergaynayo ummaddiisa maalinta la qaawan yahay ee la qatan yahay. Waxa ay tidhi:

Udug iyo udgoon lagu yaacay
Ubax iyo ugbaad lagu doogay
Qurux iyo ilwaad lagu dhaatay
Waxad tahay iftiin lagu taamay
Adigaan adduunyo u baahan
Adigaan amaanta jeclaysan
Adigaa akhlaaq u wanaagsan
Islaweyni aan ku asheedmin
Uma qalantid eed iyo caayis
Aflaagaaddo kuuma ekaanin
Waxad tahay addoonka u fiican
Waxad tahay Rasuul amranaaday
Nabiyow Allaa ba ku doortay
Waxad tahay ilayska adduunka
Waxad tahay aqoonta ku nuurshay
Waxad tahay xaqiiqda iftiinshay
Waxad tahay Ammiin lagu eertay
Waxad tahay Islaamka mideeyay
Waxad tahay asxaabtu jeclaatay
Uumiyuhu dhammaan ashqaraaray
Waxad tahay midkii la addeecay
Waxad tahay asnaamtana daadshay
Waxad tahay dadkoo dhan ajiibay
Waxad tahay iblays ku maqlaayay
Waxad tahay insaanka hormuuday
Waxad tahay arkaanta u sheegay
Adduunyo wanaagga ku faafshay
Waxad tahay addoonka u fiican
Waxad tahay Rasuul amranaaday
Nabiyow Allaa ba ku doortay
Iyadoo haweenka la aaso
Iyadoo miskiinku ilmeeyay
Iyadoo caruurtuna oyday
In awood leh uun talinayso
Adigaa xaquuqda ilaashay
Adigaa xumaanta ka ooday
Anafiyo dagaalka ka saaray
Adigaa israafka ka leexshay
Arrinkiyo ammuurta dhextaallay
Adigaa caddaalad u fiirshay
Amni iyo ammaanna ka yeelay
Waxad tahay addoonka u fiican
Waxad tahay Rasuul amranaaday
Nabiyow Allaa ba ku doortay
Adigaa asluubta baraayay
Adigaa adaabta ku toos shay
Adigaa aqoonta ku biirshay
Adigaa agnaanka ka saaray
Arxankiyo samaanta ku beeray
Ula baxay wixii ku ag yaallay
Adigaan ammaanna ka raadin
Gallad iyo abaal na u sheegan
Adigaa albaabbada khayrka
Iyadoo Ilaah ku ilaashay
Al-Raxmaanku kaa xume dhawray
Alle wayne kuu danbi dhaafay
Adigaa intaad mahaddiisa
Isu taagay layl ijtihaadka
Addimadu intay ku mudhxeenna
Ilmadaadu ruugagga qoysay
Is-dhul-dhigayna Eebbe dartiisa
Idilkood addoomaha joogay
Inaad diinta Eebbe u sheegtay
Inuu gaal irdhoobay ku oofshay
Ashahaatay oo ku adeecay
Nabiyoow Allaa maraggaaya
Ummaddaadu waa ka makhraati
Iimaankan Eebbe ku siiyay
Naflahoo dhan baa amakaagay
Waxad tahay addoonka u fiican
Waxad tahay Rasuul amranaaday
Nabiyow Allaa ba ku doortay
Marka aan qaraabo ergoonin
Isimiyo cuqaal la kaxaysan
Lacag iyo ujuuri shaqaynin
Marka hooyo aad ujeclaydi
Ilmaheeda ay ka dhaqaaqdo
Axad wali naftiisa ku biimo
Anbiyada dhankooda la aado
Aadamaha Ilaahay abuuray
Khulafiyo Ululcasmigoo dhan
Anbiyada intaad u danbaysay
Adigaa wixii ahlu khayra
Rabbigeen odhaahda ku siiyay
Akbartiyo sujuudda agtiisa
Adigaa baryada ku ilmeeyay
Erayda ilhaam ku yimaadda
Adigaa Ilaahay ku tuugay
Adigaa shafeec u ahaaday
Uumiyaha dhammaan idankiisa
Adigaa maqaam awliyeedka
Alle Weyne kuugu arsaaqay
Waxad tahay addoonka u fiican
Waxad tahay Rasuul amranaaday
Nabiyow Allaa ba ku doortay!
Lagu furay adduun waxa yaalla
Lagu furayna aabbiyo hooyo
Lagu furay arwaaxdiyo ruuxda.

 

 

the best slave.
It is the praise and of a safe the prophet the world and the best slave . In a nutshell, the creat reveals what our prophet (N.N.K.H.) deserves, and his role in the society.
— since the the emergence of the prophet. In its composition, it commemorates the life, and ideological changes that have taken place in the world,since the the emergence of the prophet.
Muhammad (N.N.K.H.), and and how he helped them the oppressed, the orphans, women, children and the whole of society and reality. The poem extends far beyond the positive qualities of our prophet (N.N.K.H.), and how he empowers his nation on the day ofin the Hereafter.

Bogga: Facebook.com/ubaxle
Dhanjac: Ubaxle@Yahoo.com