Raysal-wasaaraha Dawlada Itoobiya Abiy Axmed Oo Ka Waramay Shirqool Lagu Khaarajinaayey Isaga
Adis Ababa (OWN) – Raysal-wasaaraha Dawlada Itoobiya Abiy Axmed ayaa ka waramay ujeedada ka danbansay ciidamo dhowaan galay Xarunta uu xafiiskiisa ku yaallo ee magaalada Addis Ababa, iyagoo gadoodasan, waxaanu caddeeyay inay rabeen inay isaga dilaan ama khaarijiyaan.
Raysal-wasaaraha Dawlada Itoobiya Abiy Axmed oo ka hadlayey fadhiga baarlamaanka Itoobiya ayuu sheegay in ciidamadaasi lagu soo shubay qorshe looga horjeedo isbedellada uu wado, lana doonayey in lagu maja xaabiyo, taasoo uu ka hortegay, isla markaana si xikmad leh uu arrinta u qaboojiyey, isagoo markii danbe ciidammada faray inay isaga la sameeyaan jimicsi isagoo faraxsan oo dhoola caddeynaya.
Baarlamaanka ayuu u sheegay in maalinkaasi uu faraxsanaa balse uu gudaha ka gubanayey, arrintuna ay faraha ka bixi lahayd haddii ciidamadaasi laga hor geeyo ciidamo kale oo iska hor imaad dhaco.
“Xaaladda ciidammada waa la dejiyay, qaar kamid ah ciidammada ayaa la maqlayay iyagoo leh ‘wuxuu baxsaday ka hor inta aanan dilin’ marka, yaanan u qaadanin arrinta mid fudud” ayuu Abiy Ahmed u sheegay Baarlamaanka Itoobiya oo maanta ansixiyey golaha wasiirada cusub ee Itoobiya.
